ပေါ့ဘာ တစ်လခန့် ထပ်မံအနားယူရမည်ဟု နည်းပြရင်းနစ်ခ် အတည်ပြု
မန်ယူကွင်းလယ်လူ ပေါ့ဘာဟာ ဒဏ်ရအခြေအနေ မသက်သာသေးတာကြောင့် နောက်ထပ် တစ်လလောက် ဆက်ပြီးအနားယူသွားရမယ်လို့ နည်းပြရင်းနစ်ခ်က အတည်ပြုသွားပါတယ်။
ပေါ့ဘာဟာ ပြီးခဲ့တဲ့နှစ် နိုဝင်ဘာလကတည်းက ပြင်သစ်အသင်းအတွက် ကစားရင်း ပေါင်ခြံဒဏ်ရာရရှိခဲ့တာပါ။
ပြီးခဲ့တဲ့နှစ်ကုန်ပိုင်းက ဒူဘိုင်းကို သွားရောက်အနားယူခဲ့တဲ့ ပေါ့ဘာကို နည်းပြ ရင်နစ်ခ်က အသင်းမှာပဲ ပြန်လည်ကောင်းမွန်အောင်လေ့ကျင့်ဖို့ ပြန်ခေါ်ခဲ့တာပါ။
လက်ရှိအခြေအနေအရ နောက်ထပ် ၃-၄ ပတ်ခန့် အနားယူရမှာဖြစ်လို့ ပွဲကစားနိုင်တဲ့ ကြံ့ခိုင်မှုရဖို့ဆိုရင် ဖေဖော်ဝါရီလနောက်ပိုင်းရောက်မှ ပြန်လည်ကစားပေးနိုင်ဖွယ်ရှိပါတယ်။
“သူက အခုထိအသင်းနဲ့ လေ့ကျင့်နိုင်ခြင်း မရှိသေးပါဘူး။ အသင်းဆေးအဖွဲ့က ပြောထားသလောက် ပြောရရင် နောက်ထပ် ၃-၄ ပတ်လောက် အနားယူရဦးမှာပါ။ အဲဒါပြီးရင် ပွဲကစားနိုင်တဲ့ ကြံ့ခိုင်မှုရဖို့လည်း လိုတာကြောင့် နောက်ထပ်ရက်သတ္တပတ်တွေကို ကျော်ဖြတ်ရဦးမှာပါ” လို့ နည်းပြရင်းနစ်ခ်က ပြောပါတယ်။
ပေါ့ဘာဟာ အခုနှစ်ရာသီအကုန်မှာ စာချုပ်သက်တမ်း ကုန်ဆုံးတော့မှာဖြစ်လို့ သူ့ရဲ့ဒဏ်ရာပြဿနာက အသင်းနဲ့လမ်းခွဲသွားရဖို့အထိ ရှိနေပါတယ်။
