အသင်းမှာ ကိုဗစ်-၁၉ ရောဂါပိုးကူးစက်မှုတွေက တိုးတက်မှုကို နှောင့်နှေးစေခဲ့တယ်လို့ မန်ယူ နည်းပြ ရင်းနစ်ခ်က ပြောပါတယ်။ 

မန်ယူအသင်းဟာ ကိုဗစ်ပိုးကူးစက်မှုတွေကြောင့် ပွဲစဉ် ၂ ပွဲ ရွှေ့ဆိုင်းခဲ့ရပြီး နယူးကာဆယ်နဲ့ပွဲစဉ်မှာ တစ်ဂိုးစီသရေရလဒ်သာ ကစားနိုင်ခဲ့ပါတယ်။ 

နည်းပြ ရင်းနစ်ခ်ကတော့ ရည်မှန်းထားတဲ့ ပန်းတိုင်ကို မရောက်သေးဘဲ ကိုဗစ်ကူးစက်မှုတွေကြောင့် လေ့ကျင့်ချိန်သိပ်မရခဲ့တာက တိုးတက်မှုကို နှောင့်နှေးစေတယ်လို့ ပြောခဲ့တာပါ။  

“နည်းပြတိုင်းက သူ့ရည်မှန်းချက်နဲ့တူ ရှိကြတာပါပဲ။ မြန်နိုင်သမျှ အမြန်ဆုံးနည်းလမ်းနဲ့ ကိုယ့်အသင်းခြေစွမ်းကို တိုးတက်စေချင်ကြတယ်။ ဒါပေမဲ့ အဲဒီလိုလုပ်ဖို့က လေ့ကျင့်ရေးလုပ်နိုင်ဖို့ လိုတယ်။ လွန်ခဲ့တဲ့ ၃ ရက်လောက်ကစပြီး လေ့ကျင့်မှု အပြည့်အဝ စတင်လုပ်ဆောင်ခဲ့ပေမယ့် အများကြီး မလေ့ကျင့်နိုင်ခဲ့ပါဘူး” လို့ ရင်းနစ်ခ်က ပြောပါတယ်။ 

မန်ယူအသင်းဟာ ဒီကနေ့ညမှာ ဘန်လေအသင်းနဲ့ အိမ်ကွင်းပွဲစဉ် ယှဉ်ပြိုင်သွားရမှာဖြစ်ပါတယ်။