ဆီးရီးယားနိုင်ငံ အနောက်မြောက်ဘက်မှာ အမေရိကန်အထူးတပ်ဖွဲ့တွေက အကြမ်းဖက်မှု တိုက်ဖျက်ရေး မစ်ရှင်တခုကို  မနေ့က အောင်မြင်စွာလုပ်နိုင်ခဲ့ပြီး IS အုပ်စု ဂျီဟတ်ခေါင်းဆောင်  သေဆုံးခဲ့တယ်လို့  သမ္မတဂျိုးဘိုင်ဒင်နဲ့ ပင်တဂွန်စစ်ဌာနက အတည်ပြုပြောဆိုခဲ့ပါတယ်။

ရဟတ်ယာဉ်တွေသုံးပြီး ဗုံးကြဲတိုက်ခိုက်မှုတွေလည်း ဖြစ်ခဲ့တာကြောင့် ၁၂ ဦးလောက် သေဆုံးခဲ့ တယ်လို့ ဒေသခံတွေက ပြောပါတယ်။

သေဆုံးသူ အသက် ၄၅ နှစ်ရှိ ‘အဘူ အီဘရာဟင် အယ်လ် ဟာရှမီ အယ်လ် ကူရာရှီ’ ဟာ IS အဖွဲ့ စတင်တည်ထောင်သူ ‘အဘူ ဘာကာ  အယ်လ် ဘာဒါဒီ’ ၂၀၁၉ ခုနှစ်မှာ သေဆုံးပြီးနောက် IS အဖွဲ့ကို ဆက်ဦးဆောင်နေသူပါ။ 

အီရတ်မြေက်ပိုင်းရှိ ယာဇီဒစ်မျိုးနွယ်စုတွေကို လူမျိုးတုံးသတ်ဖြတ်ခဲ့မှုမှာ အဓိကကျသူဖြစ်ပြီး အာဖရိကမှ အာဖဂန်နစ္စတန်အထိ IS အဖွဲ့ခွဲကွန်ရက်ကို ကြီးကြပ်ကွပ်ကဲနေသူပါ။

အခု အမေရိကန်ကွန်မန်ဒိုတွေ ချည်းကပ်လာစဉ် အယ်လ် ကူရာရှီက  သူ့ကိုယ်သူ ဗုံးဖောက်ခွဲ သေဆုံးခဲ့ပြီး အမျိုးသမီးတွေနဲ့ ကလေးတွေအပါအဝင် မိသားစုကိုပါ သတ်ဖြတ်ခဲ့တယ်လို့ ပင်တဂွန်က ထုတ်ပြန်ပါတယ်။

IS ခေါင်းဆောင်က မိသားစုနဲ့ ကလေးတွေကိုပါ ဗုံးဖောက်ခွဲလုပ်ကြံသွားတာ သူရဲဘောကြောင်တဲ့ လုပ်ရပ်လို့ သမ္မတဘိုင်ဒင်က ရှုတ်ချပြောဆိုပါတယ်။