အနောက်နိုင်ငံတွေနဲ့ ဆက်ဆံရေးမှာ သံတမန်ရေးနည်းအရ အဖြေရှာဖို့ လမ်းဖွင့်ထားပေမဲ့ ရုရှားရဲ့ လုံခြုံရေး စိုးရိမ်စရာတွေနဲ့ အမျိုးသားအကျိုးစီးပွားက အဓိကဖြစ်နေတာမို့ ရုရှားအစိုးရဟာ စစ်တပ်ကို ဆက်ပြီးအားဖြည့်ထားမယ်လို့ အဖမြေ ကာကွယ်သူများနေ့ကို ဂုဏ်ပြုရုပ်သံမိန့်ခွန်း အတွင်း ရုရှားသမ္မတ ဗလာဒီမီယာပူတင်က ဖေဖော်ဝါရီ ၂၃ ရက်မှာ ပြောလိုက်ပါတယ်။

“နိုင်ငံတကာအခြေအနေက ဘယ်လောက်ထိ ကြောက်စရာကောင်းနေလဲ၊ လက်နက်ထိန်းချုပ်ရေး စနစ်က မတည်ငြိမ်လို့ လက်ရှိစိန်ခေါ်မှုတွေက ဘယ်လောက်အန္တရာယ်ရှိနေလဲ၊ နေတိုး စစ်ရေးမဟာမိတ်အဖွဲ့ရဲ့ စစ်ရေးလှုပ်ရှားမှုက ဘယ်လိုလဲဆိုတာ ကျနော်တို့ မြင်နေရတယ်။  နိုင်ငံတွေအားလုံးကို ကာကွယ်နိုင်တဲ့ ညီမျှပြီး ခွဲခြားလို့မရတဲ့ လုံခြုံရေးစနစ်ကို တည်ဆောက်ဖို့ ရုရှားရဲ့ ဆော်ဩချက်ကလည်း အဖြေမရဘူး။ အရှုပ်ထွေးဆုံး ကိစ္စရပ်တွေအတွက် သံတမန်ရေးနည်းနဲ့ အဖြေရှာဖို့ ကျနော်တို့နိုင်ငံက တိုက်ရိုက်ကျပြီး ရိုးသားတဲ့ ဆွေးနွေးပွဲတွေ အတွက် အမြဲလမ်းဖွင့်ထားပါတယ်။ ရုရှားရဲ့ အကျိုးစီးပွားနဲ့ နိုင်ငံသားတွေရဲ့ ဘေးကင်းရေးက အပြည့်အဝ ဖြစ်ရမယ်။ ဒါကြောင့် ကျနော်တို့ဟာ အဆင့်မြင့်ဆုံးပစ္စည်းကိရိယာတွေ ပံ့ပိုးပြီး ထိရောက်မှု တိုးမြှင့်တဲ့နည်းနဲ့ ကျနော်တို့ရဲ့ စစ်တပ်နဲ့ ရေတပ်ကို ဖွံ့ဖြိုးတိုးတက်အောင်နဲ့ အားပြည့်အောင် ဆက်ပြီး လုပ်သွားမယ်” လို့ ပူတင်က ပြောခဲ့ပါတယ်။