အားကစားပြိုင်ပွဲတွေမှာ ရုရှားနိုင်ငံကို ဖယ်ထုတ်ဖို့ တာဝန်ရှိသူတွေနဲ့ နာမည်ကြီးကစားသမားတွေက တောင်းဆိုနေကြပါတယ်။ 

ရုရှားသမ္မတ ပူတင်က ယူကရိန်းနိုင်ငံနဲ့ စစ်ပွဲကြေညာလိုက်တဲ့အပေါ် အား ကစားသမားတွေ ကဝေဖန်ခဲ့ကြပြီး ပြိုင်ပွဲတာဝန်ရှိသူတွေဟာလည်း ရုရှားမှာကျင်းပမယ့် အားကစားပွဲစဉ်တွေကို ရွှေ့ဆိုင်းဖို့ရှိပါတယ်။ 

လာမယ့်မေ ၂၈ ရက် စိန့်ပီတာစ်ဘက်ချ်မြို့မှာ ကျင်းပမယ့် ဖော်မြူလာဝမ်းကားမောင်းပြိုင်ပွဲကို ရုရှားမှာ ကျင်းပခြင်းမပြုဘဲ ရွှေ့ဆိုင်းဖို့ ချန်ပီယံ ၄ ကြိမ်ဖြစ်ဖူးတဲ့ ဆက်ဘက် စတီယန်ဗစ်တဲက တောင်းဆိုထားပါတယ်။ 

အလားတူ စိန့်ပီတာစ်ဘက်ချ်မှာပဲ ကျင်းပဖို့ သတ်မှတ်ထားတဲ့ ဥရောပချန်ပီယံလိဂ်ဘောလုံးပြိုင်ပွဲ ဗိုလ်လုပွဲကိုလည်း အင်္ဂလန်မှာပြောင်းလဲကျင်းပဖို့ ရှိပါတယ်။ 

အလားတူဥရောပဇုန် ကမ္ဘာ့ဖလားခြေစစ်ပွဲ ပလေအော့ဖ်ဆီမီးဖိုင်နယ်အဆင့်မှာလည်း ရုရှားက ပိုလန် နဲ့ မော်စကိုမြို့မှာ ကစားဖို့ရှိပါတယ်။ အဲဒီပွဲစဉ်ကို ရုရှားမှာ ကျင်းပခြင်းမပြုဖို့ တစ်ဖက် ဆီမီးဖိုင်နယ်ပွဲစဉ်က ဆွီဒင်နဲ့ ချက်အသင်းတွေက တောင်းဆိုထားပါတယ်။ 

ဒါ့အပြင် အင်္ဂလန်မှာ ကျင်းပမယ့် ယူရိုအမျိုးသမီးဘောလုံးပြိုင်ပွဲမှာလည်း ရုရှားအသင်းကို ထုတ်ပယ်ဖို့ ဖိအားပေးနေကြပါတယ်။ 

ဘောလုံးပွဲစဉ်တွေနဲ့ ပတ်သက်တဲ့ ဖီဖာအစည်းအဝေးကိုတော့ လာမယ့်ဖေဖော်ဝါရီ ၂၅ ရက်နေ့ ဆွေးနွေးဆုံးဖြတ်မှာဖြစ်ပါတယ်။ 

ဂျာမန်ကလပ် ရှော်ကေးအသင်းကတော့ ရုရှားနိုင်ငံပိုင် ကုမ္ပဏီတစ်ခုဖြစ်တဲ့ Gazprom နဲ့ စပွန်ဆာစာချုပ်ဖျက်သိမ်းခဲ့ပါတယ်။