ကိုဗစ်-၁၉ ရောဂေါနဲ့ လူသေဆုံးမှုရှိခဲ့တဲ့ ဧရာဝတီတိုင်း ဘိုကလေးမြို့မှာ စစ်ကောင်စီက ဦးဆောင်ကျင်းပတဲ့ ပျော်ပွဲရွှင်ပွဲနဲ့ အားကစားပြိုင်ပွဲတွေကြောင့် ရောဂါကူးစက်ပျံနှံ့မှာ ဒေသခံတွေ စိုးရိမ်နေကြပါတယ်။

စစ်ကောင်စီက ဦးဆောင်ကျင်းပနေတဲ့ အားကစားပြိုင်ပွဲတွေမှာ ကိုဗစ်-၁၉ ရောဂါ ကာကွယ်တာတွေမရှိဘဲ လူစုလူဝေးတွေနဲ့ပြုလုပ်ကျင်းပနေတဲ့အတွက် ရောဂါကူးစက်ပျံ့နှံ့မှာ စိုးရိမ်နေကြတာလို့ ဒေသခံတွေက ပြောပါတယ်။

“ဘိုကလေးမှာ စစ်ကောင်စီက ဦးဆောင်ပြီး အားကစားပြိုင်ပွဲတွေ ပျော်ပွဲရွှင်ပွဲတွေ ကျင်းပနေတယ်။ ရောဂါကူးစက်မှာကို ဘာမှာ ကာကွယ်တာလည်းမရှိဘူး။ Maskတွေလည်း မတပ်ကြဘူး။ အချို့ဆို ယူနီဖောင်းတွေဝတ်ပြီး  mask မတပ်ကြတာ။ ဘိုကလေးမှာလည်း  ကိုဗစ်ရောဂါ နဲ့ သေဆုံးတာတွေ ကူးစက်တာတွေရှိလာပြီ။ သူတို့က လူစည်ကားအောင်လုပ်နေတာ  အဲ့ဒီပျော်ပွဲရွှင်ပွဲ  အားကစားပြိုင်ပွဲတွေကနေ ရောဂါတွေ ကူးစက်ပျံ့နှံ့သေဆုံးကုန်ရင် ဘယ်သူတာဝန်ယူမှာလဲ” လို့ ဘိုကလေး မြို့ခံတစ်ဦးကပြောပါတယ်။

ဘိုကလေးမြို့မှာ စစ်ကောင်စီက ဦးဆောင်ပြီး ၇၅ နှစ်မြောက် စိန်ရတု ပြည်ထောင်စုနေ့အထိမ်းအမှတ် ပြည်ထေါင်စုငြိမ်းချမ်းရေးဖလား  အမျိုးသားအလွတ်တန်း ဘောလုံးပြိုင်ပွဲကို ဇန်နဝါရီ ၁၃ ရက်နေ့က စတင်ကာ ဖေဖော်ဝါရီ ၇ ရက်နေ့အထိကျင်းပခဲ့တာပါ။

ဖေဖော်ဝါရီ ၆ ရက်နေ့က ဘိုကလေးကုတင် ၁၀၀ ဆေးရုံမှာ ကိုဗစ်-၁၉ ကာကွယ်ဆေး ၃ ကြိမ် ထိုးထားတဲ့ အမျိုးသမီးတစ်ဦး ရောဂါကူးစက်ခံရပြီး သေဆုံးခဲ့ကာ ဖေဖော်ဝါရီ ၈ ရက်နေ့အထိ ရောဂါကူးစက်ခံရသူ ၁၂ ဦးထိ ရှိနေပါတယ်။

၇၅ နှစ်မြောက် ပြည်ထောင်စုနေ့မှာလည်း ဧရာဝတီတိုင်းအတွင်းက မြို့နယ်တွေမှာ အားကစားပြိုင်ပွဲတွေကို လူစုလူဝေးနဲ့ ကျင်းပဖို့ စစ်ကောင်စီက စီစဉ်ဆောင်ရွက်နေပြီး ဧရာဝတီတိုင်းအတွင်းမှာ ဖေဖော်ဝါရီ ၈ရက်နေ့အထိ  ကိုဗစ်-၁၉ ကူးစက်ခံနေရသူ ၁၀၀  ကျော်ထိ ရှိနေပါတယ်။

နိုင်ငံတဝန်းလုံးမှာလည်း တရက်တည်း ကိုဗစ်-၁၉ အတည်ပြုလူနာသစ် ၁၁၄၅ ယောက်နဲ့ ကူးစက် ခံရသူပေါင်း ၅၃၉,၅၅၄ ယောက်ရှိပြီလို့ စစ်ကောင်စီကျန်းမာရေးဝန်ကြီးဌာနက ဖေဖော်ဝါရီ ၈ ရက်ညပိုင်းမှာ ထုတ်ပြန်ထားပါတယ်။

ဓါတ်ပုံ   ဘိုကလေးမြို့နယ် ထွေအုပ်