ယူကရိန်းမြို့တော် ကိယက်ဗ်ကို ဖေဖော်ဝါရီ ၂၅ ရက်နေ့မှာ ရုရှားက မစ်ဇိုင်းဒုံးကျည် အတော်အများများနဲ့ ပစ်ခတ်ခံခဲ့ရပြီး ဒေသခံတွေကတော့ ရုရှားတွေ ကျူးကျော်သိမ်းပိုက်တော့မယ်လို့ ယုံကြည်နေပါတယ်။

ဒုံးကျည်ထိမှန်တဲ့ အဆောက်အအုံတချို့နဲ့ တိုက်ခန်းတွေ မီးစွဲလောင်နေပါတယ်။ လူ ၃ သန်းကျော်ရှိတဲ့ မြို့တော်ကနေ ထောင်သောင်းချီပြီး  ထွက်ခွာသွားပါပြီ။  တခြားမြို့ကြီးတွေလည်း ပစ်ခတ်တိုက်ခိုက်ခံရပြီး ပေါက်ကွဲမှုတွေ ဖြစ်နေတာပါ။

ဘီလာရုစ်နိုင်ငံဘက်က ဝင်လာတဲ့ ရုရှားတပ်တွေက ကိယက်ဗ်မြို့မြောက်ဘက်ရှိ ချာနိုဘိုင်း နျူကလီးယား ဓာတ်ပေါင်းဖိုဟောင်းကို သိမ်းပိုက်ထားလိုက်ပါပြီ။ 

ယူကရိန်းအစိုးရက ရုရှားတိုက်လေယာဉ်တစင်းကို ပစ်ချနိုင်ပြီး တစီးက အဆောက်အအုံတခုကို ဝင်တိုက် မီးလောင်သွားတယ်လို့ ကြေညာပါတယ်။ 

ရုရှားတပ်တွေဟာ အင်အားလက်နက် အစစသာလွန်နေပေမဲ့ ယူကရိန်းတပ်တွေက လေးနေရာခွဲ ပြီး ခုခံသွားမယ်လို့လည်း ပြောပါတယ်။ 

သမ္မတဇလန်းစကီးက နိုင်ငံတကာအနေနဲ့ စီးပွားရေးပိတ်ဆို့မှုထက် ပိုပြီး ကူညီပေးဖို့ တောင်းဆိုပါတယ်။ 

ရုရှားက သူ့ကို ပစ်မှတ်ထား ဝင်လာနေတာလို့လည်း ပြောပါတယ်။ ရုရှားအစိုးရက ယူကရိန်းကို သိမ်းပိုက်ထားလိုတဲ့ အစီအစဉ်မရှိဘဲ ယူကရိန်းခေါင်းဆောင်တွေနဲ့ အစိုးရအဖွဲ့ကို ဖြုတ်ချဖို့ ရည်ရွယ်တာလို့ ကြေညာပါတယ်။ 

နောက် ရုရှားကိုယ်စားလှယ်အဖွဲ့တဖွဲ့ကို ဘိလာရုစ်နိုင်ငံ စေလွှတ်ပြီး ယူကရိန်းနဲ့ ဆွေးနွေးဖို့ ကမ်းလှမ်းထားပါတယ်။ 

ယူကရိန်းဘက်ကလည်း နေတိုးအဖွဲ့မဝင်ဘဲ ကြားနေနိုင်ငံအဖြစ် ကြေညာဖို့ ညှိနှိုင်းနေတယ်လို့ ရိုက်တာသတင်းက ဖော်ပြပါတယ်။ 

သောကြာနေ့မှာပဲ ကုလသမဂ္ဂလုံခြုံရေးကောင်စီက ယူကရိန်းထဲကျူးကျော်ဝင်ရောက်မှုကို ရှုတ်ချတဲ့ ဆုံးဖြတ်ချက်မူကြမ်း မဲခွဲဆုံးဖြတ်ခဲ့ပါတယ်။

ရုရှားက ဗီတိုသုံးပယ်ချပြီး တရုတ်က မော်စကိုရဲ့ ကျူးကျော်မှုလို့ ခေါ်ဆိုသုံးနှုန်းဖို့ ငြင်းဆန်ခဲ့ပါတယ်။