ဩစတြေးလျနိုင်ငံအရှေ့ဘက် ကမ်းရိုးတန်းမှာ ဖေဖော်ဝါရီ ၂၈ ရက်က မိုးသည်းထန်စွာ ရွာသွန်းပြီး ရေကြီးတာကြောင့် ဒေသခံထောင်သောင်းချီ ဘေးလွတ်ရာ ရွှေ့ပြောင်းဖို့ အမိန့်ထုတ်ခဲ့ရပါတယ်။

အသက်ဘေးရှိလောက်တဲ့ ရုတ်တရက် ရေကြီးမှုတွေကို အာဏာပိုင်တွေက သတိပေးထားပြီး ဒေသခံတွေ အိမ်ခေါင်မိုးတွေပေါ်မှာ သောင်တင်နေပါတယ်။

ဖေဖော်ဝါရီ ၂၄ ရက်က စတဲ့ ရေကြီးမှုကြောင့် လူ ၉ ယောက် သေဆုံးခဲ့ပြီးပါပြီ။ လူ ၄ ယောက်ထက်မနည်း ပျောက်ဆုံးနေပြီး  ကယ်ဆယ်ရေး အဖွဲ့တွေက ရှာဖွေနေပါတယ်။

ကယ်ဆယ်ရေးနဲ့ ရှာဖွေရေးလုပ်ငန်းတွေကို ဦးဆောင်ဖို့ ရေဘေးသင့်ဒေသတွေမှာ ကာကွယ်ရေး အရာရှိတွေကို တာဝန်ချထားမယ်လို့ ဝန်ကြီးချုပ် စကော့မော်ရစ်ဆင်က ပြောပါတယ်။

ဒီမိုးကိုလည်း မိုးလေဝသဗုံးလို့ သူက ခေါ်ဝေါ် လိုက်ပါတယ်။

နိုင်ငံမြောက်ပိုင်းက လစ်မိုးမြို့မှာ ဗဟိုစီးပွားရေးခရိုင်တခုလုံး ရေအောက်မြုပ်နေပုံကို ရုပ်သံတွေက ပြသပါတယ်။

မြို့ရဲ့ ဝီလ်ဆန်စ်မြစ်ရေဟာ ၁၉၅၄ တုန်းက စံချိန်ကို ချိုးပြီး တနင်္လာမွန်းလွဲပိုင်းမှာ ၁၄ ဒသမ ၄ မီတာအထိ ရေတက်နိုင်တယ်လို့ မိုးလေဝသဗျူရိုက သတိပေးထားပါတယ်။

အံ့အားသင့်စရာ ရေတက်ခဲ့လို့ မြို့တွင်းဒေသခံ အယောက် ၃ သောင်းနီးပါးဟာ ရာချီတဲ့ ကယ်ဆယ်ရေးသမားတွေနဲ့အတူ သူတို့အိမ်တွေကို ချက်ချင်း စွန့်ခွာခဲ့ရတယ်လို့ နယူးဆောက်သ်ဝေးစ်ပြည်နယ် ဝန်ကြီးချုပ်က ပြောပါတယ်။

ဩစတြေးလျနိုင်ငံ ဒေသအတော်များများမှာ ပြီးခဲ့တဲ့ ဖေဖော်ဝါရီက မရပ်မနား ရွာတဲ့မိုးကြောင့် မိုးရေချိန် စံချိန်ကျိုးခဲ့တာပါ။

တချို့နေရာတွေမှာ တရက်အတွင်း ရွာချတဲ့ မိုးရေချိန်ဟာ ပျမ်းမျှ တလစာ တနှစ်စာ မိုးရေချိန်ကို ကျော်လွန် ရွာချခဲ့ပါတယ်။