ပီအက်စ်ဂျီနည်းပြလျာထားစာရင်းတွင် အာဆင်နယ်နှင့်စပါးနည်းပြတို့ ပါဝင်
ပီအက်စ်ဂျီအသင်းရဲ့ နည်းပြသစ်လျာထားစာရင်းမှာ အာဆင်နယ်နည်းပြ အာတီတာနဲ့ စပါးနည်းပြ ကွန်တီတို့ပါဝင်နေပါတယ်။
လက်ရှိနည်းပြ ပိုချက်တီနိုဟာ ချန်ပီယံလိဂ်ပြိုင်ပွဲမှာ အောင်မြင်မှုမရခဲ့တာကြောင့် ရာသီအကုန်မှာ ထုတ်ပယ်ခံရဖို့ရှိပါတယ်။
ရာသီအကုန်မှာ နည်းပြသစ်တဦး ခန့်အပ်နိုင်ဖို့ ပီအက်စ်ဂျီအသင်းက ရှာဖွေနေပြီး နည်းပြ ၈ ဦးလောက်အထိ လျာထားစာရင်းမှာပါ ဝင်နေပါတယ်။
အဲဒီအထဲမှာ အာဆင်နယ်နဲ့အတူ ပုံစံကောင်းရရှိအောင် စွမ်းဆောင်ပြထားတဲ့ နည်းပြ အာတီတာ လည်းပါဝင်ပါတယ်။
စပိန်နည်းပြအာတီတာဟာ အာဆင်နယ်ကို ချန်ပီယံလိဂ်ဝင်ခွင့်ရဖို့ ကြိုးပမ်းနေပြီး ဝင်ခွင့်ရခဲ့မယ်ဆိုရင်တော့ အသင်းပြောင်းဖို့ ဖြစ်နိုင်ချေနည်းပါကြောင်း ပြင်သစ်သတင်းစာ L’Equipe က ဖော်ပြခဲ့ပါတယ်။
ဒါ့အပြင် စပါးနည်းပြ ကွန်တီကိုလည်း စိတ်ဝင်စားနေပြီး တခြား နည်းပြ ၆ ဦးလောက်လည်း သူတို့ရဲ့လျာထားစာရင်းမှာပါဝင်နေတာပါ။
ရီးရဲလ်မက်ဒရစ်နည်းပြဟောင်း ဇီဒန်း၊ ဂျူဗင်တပ်နည်းပြ အယ်လီဂရီ၊ အေဂျက်ဇ်နည်းပြတန်ဟတ်ချ်၊ အက်သလက်တီကို နည်းပြ ဆီမြွန်နီ၊ အင်တာမီလန်နည်းပြ အင်ဇာဂီ နဲ့ စပက်ဇီယာနည်းပြ သီယာဂိုမော့တာ တို့လည်း ပါဝင်နေပါတယ်။
ပီအက်စ်ဂျီအသင်းဟာ ၂၀၁၁ ခုနှစ်က အသင်းပိုင်ရှင်သစ်ရောက်လာပြီးနောက်မှာ ဥရောပချန်ပီယံလိဂ်ဖလားရယူနိုင်ဖို့ ပစ်မှတ်ထားကြိုးပမ်းနေပေမယ့် လက်ရှိအချိန်အထိ ရယူနိုင်ခြင်း မရှိသေးတာဖြစ်ပါတယ်။
