မအူပင်အကျဉ်းထောင်မှ CDM ဆရာဝန် ၁ ဦးအပါဝင် ၄ ဦးလွတ်မြောက်
ဧရာဝတီတိုင်း၊ မအူပင်မြို့မှာရှိတဲ့ အကျဉ်းထောင်ကနေ စစ်တပ်အာဏာသိမ်းပြီးနောက်ပိုင်း အကြမ်းမဖက် အာဏာရှင်ဖီဆန်ရေးမှာ ပါဝင်ခဲ့တဲ့ ဆရာဝန် ၁ ဦး အပါဝင် ၄ ဦး မတ်လ ၁၄ ရက်နေ့ ညနေပိုင်းက ပြန်လည်လွတ်မြောက်လာတယ်လို့ သိရပါတယ်။
မအူပင်အကျဉ်းထောင်ကနေ ညနေပိုင်းမှာ ပုဒ်မ ၅၀၅ (က) နဲ့ ဖမ်းဆီးခံထားရတဲ့ ဖျာပုံမြို့က CDM ဆရာဝန် ဒေါက်တာ နိုင်ထူးနဲ့ အရပ်သား ၃ ဦးကို ပြန်လွှတ်ပေးခဲ့တာလို့ နိုင်ငံရေးတက်ကြွလှုပ်ရှားသူတွေက ပြောပါတယ်။
“အဖမ်းခံထားရတာ ၁ နှစ်လောက်ရှိပြီး ပြီးခဲ့တဲ့နှစ် ဖေဖော်ဝါရီလကတည်းက အဖမ်းခံရတာ မနေ့က ညနေ ၄ နာရီလောက်ကမှ ပြန်လွှတ်ပေးတာ” လို့ နိုင်ငံရေးတက်ကြွလှုပ်ရှားသူတဦးက ပြောပါတယ်။
စစ်ကောင်စီက ၁ နှစ်ကျော်ကြာ ဖမ်းဆီးထိန်းသိမ်းခံခဲ့ရတဲ့ ဒေါက်တာ နိုင်ထူး အပါဝင် ဒေသခံပြည်သူ ၄ ဦးဟာ စစ်တပ်အာဏာသိမ်းမှုကို ဆန့်ကျင်ဆန္ဒပြမှုတွေမှာလည်း ပါဝင်ခဲ့ကြသူတွေဖြစ်တယ်လို့ ဆိုပါတယ်။
ဒေါက်တာ နိုင်ထူးအပါဝင် ၄ ဦးကို စစ်တပ်က နိုင်ငံတော်အကြည်ငြိုပျက်စေမှုနဲ့ တရားစွဲဖမ်းဆီးခဲ့ပေမယ့် သက်သေအထောက်ထား မခိုင်လုံတာကြောင့် ပြန်လွှတ်ပေးခဲ့တာလို့ သိရပါတယ်။
