အမေရိကန်အစိုးရဟာ လောင်စာဆီစျေးနှုန်း မြင့်တက်နေတာကို လျော့ပါးသက်သာစေဖို့ ဆက်လက်ပြီး အဆင့်ဆင့်ဆောင်ရွက်သွားမယ်လို့ အမေရိကန်သမ္မတ အိမ်ဖြူတော် ပြန်ကြားရေး အတွင်းဝန် ဂျန်ဆာကီက မတ် ၁၄ ရက်မှာ ပြောပါတယ်။

သီတင်းပတ် နှစ်ပတ်နီးပါးအတွင်း အနိမ့်ဆုံးအနေနဲ့ တနင်္လာနေ့က လောင်စာဆီစျေး ၅ ရာခိုင်နှုန်း ကျော် ကျဆင်းခဲ့တာပါ။

ယူကရိန်းကို ရုရှားက ကျူးကျော်မှုအတွက် သံတမန်ရေး အဆုံးသတ် တိုးတက်မှုတွေကို မျှော်လင့်နေချိန်မှာ ခုလို ရေနံစျေးကျခဲ့တာပါ။ တရုတ်နိုင်ငံထဲမှာ ကိုဗစ်-၁၉ ကပ်ရောဂါ ကူးစက်နေလို့ ခရီးသွားတားမြစ် ပိတ်ပင်ချက်တွေ ထုတ်ပြန်ထားတဲ့အတွက် စျေးကွက်ဝယ်လိုအား အပေါ် သံသယရှိပေမဲ့ လောင်စာဆီ စျေးကျတာဟာ ကမ္ဘာလုံးဆိုင်ရာ ထောက်ပံ့မှု တိုးမြှင့်ရေး အတွက် တိုးတက်မှုလည်း ဖြစ်ပါတယ်။

ရုရှားနဲ့ ယူကရိန်း ကိုယ်စားလှယ်တွေဟာ အိမ်နီးချင်း ဘဲလာရုစ်နိုင်ငံမှာ လူချင်းတွေ့မယ့်အစား ရုပ်သံကွန်ရက်ကတဆင့် တနင်္လာနေ့က လေးချီမြောက် ဆွေးနွေးခဲ့ပါတယ်။ ဒါပေမဲ့ တိုးတက်မှု အသစ်ကိုတော့ မကြေညာခဲ့ပါဘူး။

ယူကရိန်းကတော့ အပစ်အခတ်ရပ်စဲရေး၊ ရုရှားတပ်တွေ ချက်ချင်းပြန်ဆုတ်ရေးနဲ့ လုံခြုံရေး အာမခံချက်တွေကို ရုရှားနဲ့ ဆွေးနွေးပွဲအတွင်း တောင်းဆိုခဲ့တယ်လို့ ပြောပါတယ်။

ရုရှားဟာ ဒဏ်ခတ်ခံထားရပေမဲ့ ရုရှားရဲ့  ရေနံနဲ့ အေးခဲဓာတ်ငွေ့ရည်ထုတ်လုပ်မှုဟာ မတ်လမှာ တရက်ကို စည်ပေါင်း ၁၁ ဒသမ ၁၂ သန်းအထိ ပိုတိုးထုတ်လုပ်ခဲ့တာလို့ ထုတ်လုပ်မှုနဲ့ နီးကပ်တဲ့ သတင်းရင်းမြစ်နှစ်ရပ်က ရိုက်တာသတင်းဌာနကို ပြောပါတယ်။

အမေရိကန်က ရုရှားဆီက လောင်စာဆီ တင်ပို့မှုကို တားမြစ်ပိတ်ပင်ခဲ့ပြီး ဗြိတိန်ကတော့ ၂၀၂၂ နှစ်ကုန်ပိုင်းမှာ ရုရှားလောင်စာကို တင်သွင်းမှုရပ်မယ်လို့ ပြောပါတယ်။

ရုရှားဟာ ကမ္ဘာ့ထိပ်တန်း ရေနံစိမ်းနဲ့ လောင်စာဆီထုတ်ကုန် တင်ပို့သူဖြစ်ပြီး ကမ္ဘာ့ စျေးကွက်ဖြန့်ဖြူးမှု ၇ ရာခိုင်နှုန်းနဲ့ ညီမျှတဲ့ တရက်ကို လောင်စာဆီစည်ပေါင်း ၇ သန်း တင်ပို့ ရောင်းချနေပါတယ်။