ထိုင်းနိုင်ငံမြို့တော်၊ ဘန်ကောက်မှာ ချစ်ကြည်ရေးဘောလုံးပွဲ ကစားကြမယ့် မန်ယူနဲ့ လီဗာပူးအသင်းတို့ရဲ့ ပွဲလက်မှတ်တွေကို လာမယ့် ဧပြီ ၂ ရက်မနက် ၁၀ နာရီက စတင်ပြီးတော့ ရောင်းချသွားမယ်လို့ သိရပါတယ်။

ပွဲစီစဉ်တဲ့ Fresh Air Festival ကတော့ “The Match Bangkok Century Cup 2022” အမည်နဲ့ ဒီပွဲလက်မှတ်တွေကို နိုင်ငံတဝန်းလက်မှတ်အရောင်းကောင်တာတွေနဲ့ ဝက်ဘ်စာမျက်နှာ www.thaiticketmajor.com ဒါမှမဟုတ် ဖုန်းနံပါတ် (+66) 2262 3838 တို့ဆီ ဆက်သွယ်ဝယ်ယူနိုင်မှာဖြစ်ကာ တယောက်ကို လက်မှတ် ၄ စောင်အထိသာ ဝယ်ယူနိုင်မယ်လို့ ပြောပါတယ်။

ရာဇမင်္ဂလာအမျိုးသားအားကစားရုံမှာ လာမယ့် ဇူလိုင် ၁၂ ရက် ည ၈ နာရီမှာ ကစားကြမယ့် ဒီပွဲစဉ်အတွက် လက်မှတ်ဈေးနှုန်းတွေကိုတော့ ဘတ် ၅၀၀၀၊ ၇၀၀၀၊ ၂၀၀၀၀၊ ၂၂၀၀၀ နဲ့ ၂၅၀၀၀ အသီးသီးသတ်မှတ်ထားတယ်လို့ Fresh Air Festival က ကနဦးကြေညာထားပါတယ်။

ဒီပွဲမစခင်မှာ ယူကေက အားကစားကွင်းတွေလို ကွင်းတခုလုံး ခုံတွေ၊ ဝင်ပေါက်လိုဏ်တွေကနေ အဝတ်လဲခန်းတွေအထိ ပြုပြင်မွမ်းမံတာတွေ လုပ်ဆောင်သွားမယ်လို့ ပွဲစီစဉ်သူက ပြောပါတယ်။