ရက္ခိုင့်တပ်တော်ရဲ့ အုပ်ချုပ်ရေးနဲ့ တရားစီရင်ရေးတွေအပြင် အစ္စလာမ်ဘာသာဝင်တွေနဲ့ သဟဇာတဖြစ်ရေးဆောင်ရွက်ချက်တွေကို အာဏာသိမ်းစစ်ကောင်စီက နှောင့်ယှက်နေတဲ့အတွက် စစ်ရေးအရ မလွဲမသွေ ဖြေရှင်းလာရလိမ့်မယ်လို့  ရက္ခိုင့်တပ်တော်ပြောရေးဆိုခွင့်ရှိသူ ဦးခိုင်သုခက ဧပြီလ ၅ ရက် သတင်းစာရှင်းလင်းပွဲမှာ ပြောပါတယ်။

ကျောက်ဖြူ၊ ရမ်းဗြဲနဲ့ တောင်ကုတ်ဘက်မှာရှိတဲ့ ရက္ခိုင့်တပ်တော်ရဲ့ တရားရုံးတွေနားမှာ အာဏာသိမ်းစစ်ကောင်စီက ရှာဖွေနှောင့်ယှက်တာ စစ်ရေးလှုပ်ရှားမှုတွေလုပ်ဆောင်နေသလို ရက္ခိုင့်တပ်တော် တရားရုံးမှာ တိုင်ထားတဲ့အမှုတွေကို အာဏာသိမ်းစစ်ကောင်စီတရားရုံးတွေမှာ တိုင်ဖို့ ဖိအားပေးခြိမ်းခြောက်တာတွေ လုပ်ဆောင်နေတယ်လို့လည်းဆိုပါတယ်။

အခုလို လုပ်ဆောင်မှုတွေက လက်ရှိအခြေအနေကို မတည်ငြိမ်အောင်လုပ်ရာရောက်ပြီး  ပြည်သူလူထုနဲ့ ရက္ခိုင့်တပ်တော်ကြား နှစ်ဖက်ယုံကြည်မှုကိုလည်း ပျက်ပြားစေတယ်လို့ ရက္ခိုင့်တပ်တော် ပြောရေးဆိုခွင့်ရှိသူ ဦးခိုင်သုခက ပြောပါတယ်။ 

အဲဒီအပြင်အာဏာသိမ်း စစ်ကောင်စီအနေဖြင့် ရခိုင်ပြည်နယ်အတွင်းမှာ စစ်အင်အား၊ လူအင်အား၊ လက်နက်အင်အားနဲ့ ရိက္ခာဖြည့်ဆည်းမှုတို့ ပိုမိုလုပ်ဆောင်နေတယ်လို့လည်း ဆိုပါတယ်။

ရက္ခိုင့်တပ်တော်ရဲ့ တရားရေးဌာနကို  တိုင်ကြားထားတဲ့အမှုပေါင်းက ၂၀၂၁ ခုနှစ်ကနေ ၂၀၂၂ ခုနှစ် ၃ လပိုင်းအထိ အမှုအရေအတွက် ၅၆၈၀ ကျော်ရှိပြီး အဲဒီအထဲက အမှုပေါင်း ၂၉၀၀  ကျော်ကို ဖြေရှင်းဆောင်ရွက်ပြီးဖြစ်တယ်လို့လည်း သတင်းစာရှင်းလင်းပွဲကနေ သိရပါတယ်။