တနင်္သာရီတိုင်း၊ ထားဝယ်ခရိုင်၊ ရေဖြူမြို့နယ်၊ ကံပေါက်ဒေသ ရွာပတ်လမ်း(ရတနာလမ်း)မှာ ဧပြီ ၄ ရက် မွန်းလွဲ ၁ နာရီလောက်မှာ စစ်ကောင်စီတပ်က  ဒေသခံလူငယ် ၂ ဦး ကို တားဆီးစစ်ဆေးဖို့ ခေါ်စဉ် လှည့်ပြေးလို့ သေနတ်နဲ့ ပစ်ခတ်ရာ ၁ ဦး သေဆုံးပြီး ၁ ဦးဒဏ်ရာ ရရှိတယ်လို့ ဒေသခံတွေက ပြောပါတယ်။

သေနတ်နဲ့ ပစ်ခတ်ခံရသူတွေဟာ ကံပေါက်ကျေးရွာက လှည်းကုန်းရပ်ကွက်မှာ နေထိုင်တဲ့ အသက် ၂ဝ ဝန်းကျင် လူငယ်တွေ ဖြစ်ကြပါတယ်။

ရပ်ကွက်နေထိုင်သူ အမျိုးသမီးတဦးက “သူတို့ နှစ်ယောက်က ရွာပြင်လမ်းက အိမ်မှာ ရေတွင်းသွားတူးနေတာ လေးရက်လောက်ရှိပြီ။ ဒီနေ့က ထမင်းစား အိမ်ပြန်ပြီး အလုပ်ပြန်သွားဆင်းချိန် သူတို့ ရေတွင်းတူးတဲ့အိမ်က မူးယစ်ဆေးကိစ္စနဲ့ စစ်သားတွေ ဝိုင်းထားခံရတာ မြင်တော့ ပြန်လှည့်ပြေးတာ အဲဒီမှာ ပစ်ခံရတာပဲ” လို့ ပြောပြပါတယ်။

သေနတ်နဲ့ ပစ်ခတ်ခံရတဲ့ လူငယ် ၂ ယောက်မှာ တယောက်က နေရာမှာတင် လဲကျသွားပြီး နောက်တယောက်က နားရွက်ကို ကျည်ဆန် ထိမှန်သွားကာ နှစ်ယောက်စလုံးကို စစ်တပ်က ကားနဲ့တင်ဆောင်သွားပြီး မောရဝတီရေတပ်ရှိ  စစ်တပ်ဆေးရုံကို ခေါ်ဆောင်သွားတယ်လို့ သိရပါတယ်။

ပစ်ခတ်ခံရလို့  သေဆုံးသွားတဲ့ လူငယ်ရဲ့ ရုပ်အလောင်းကို မိသားစုက အခုချိန်အထိ ပြန်မရသေးပါဘူး။ ကံပေါက်ဒေသမှာ အာဏာသိမ်းပြီးနောက် စစ်တပ်က ပစ်ခတ်လို့  သေဆုံးတာဟာ အခုအကြိမ် ပထမဆုံးဖြစ်ပါတယ်။