မန်ယူအသင်းပရိသတ်တွေဟာ နောဝှစ်ချ်အသင်းနဲ့ အိမ်ကွင်းပွဲစဉ်မတိုင်ခင်မှာ ပိုင်ရှင် ဂလေဇာ မိသားစုကို ဆန္ဒပြတောင်းဆိုဖို့ ပြင်ဆင်နေကြပါတယ်။ 

အသင်းရဲ့ ရလဒ်ပိုင်း ဆိုးရွားနေတဲ့အပေါ်မှာ အသင်းပိုင်ရှင်တွေရဲ့ စီမံခန့်ခွဲမှုကြောင့်လို့ ပရိသတ်တွေက ထင်မြင်ကြပြီး အသင်းကနေ ထွက်သွားဖို့ ဖိအားပေးသွားမယ်လို့ သိရပါတယ်။ 

The 1958 လို့ အမည်ပေးထားတဲ့ မန်ယူပရိသတ်အဖွဲ့ဟာ နောဝှစ်ချ်အသင်းနဲ့ ပွဲစဉ်ကို ပွဲချိန် ၁၇ မိနစ်ရောက်မှ ကွင်းထဲဝင်ဖို့ စီစဉ်ထားပါတယ်။ ဒါဟာ ဂလေဇာ မိသားစုက မန်ယူအသင်းကို ဝယ်ယူခဲ့တဲ့ ၁၇ နှစ်မြောက် ပိုင်ဆိုင်ထားမှုကို ရည်ညွှန်းပါတယ်။ 

အသင်းပိုင်ရှင်တွေဟာ မန်ယူအသင်းကို စီးပွားရေးအမြင်နဲ့သာ စီမံခန့်ခွဲနေကြပြီး သူတို့ ဆက်ရှိနေသမျှ အသင်းအောင်မြင်မှု ရရှိနိုင်တော့မှာ မဟုတ်ဘူးလို့ ပရိသတ်တွေက ယုံကြည်နေကြတာပါ။ 

ဆိုရှယ်မီဒီယာ တွစ်တာပေါ်မှာလည်း ဆန္ဒပြသွားမယ့်အကြောင်းကို The 1958 လို့ခေါ်တဲ့ မန်ယူပရိသတ်အဖွဲ့က တရားဝင်ကြေညာထားပါတယ်။ 

မန်ယူအနေနဲ့ ပရီးမီးယားလိဂ်ချန်ပီယံ ပြန်ဖြစ်ဖို့ နှစ်ပေါင်းများစွာ စောင့်ဆိုင်းခဲ့ရတဲ့ လီဗာပူးအသင်းလို မဖြစ်စေရဘူးလို့လည်း ကြေညာချက်မှာ ထည့်သွင်းရေးသားထားပါတယ်။ 

မန်ယူပရိသတ်တွေဟာ ပြီးခဲ့တဲ့နှစ်ကလည်း ဥရောပစူပါလိဂ်ပြိုင်ပွဲကစားဖို့ ဆုံးဖြတ်ခဲ့တဲ့အပေါ် အသင်းပိုင်ရှင်တွေကို ဆန္ဒပြခဲ့ကြပါတယ်။