စစ်ကိုင်းတိုင်း ကလေးမြို့နယ်တောင်ပိုင်းကို ဧပြီ ၂၄ ရက် မနက်ပိုင်းက ခြေလျင်စစ်ကြာင်း  အပါအဝင် စစ်ကား ၆ စီး၊ အင်အား ၁၅၀ လောက်နဲ့ စစ်ကြာင်းထိုးလာတဲ့ စစ်ကောင်စီတပ်တွေကို ကလေး PDF တပ်ဖွဲ့ဝင်တွေက စည်သာရွာနဲ့ နတ်​မြောင်းရွာကြားမှာ အသင့်တပ်ဆင်ထားတဲ့ မိုင်းတွေနဲ့ အဆင့်ဆင့်​ဖောက်ခွဲတိုက်ခိုက်ခဲ့တယ်လို့ ကလေး PDF တပ်ဖွဲ့ဝင်တဦးက ပြောပါတယ်။ 

တိုက်ခိုက်ခံရတာကြောင့် စစ်ကောင်စီတပ်သား အနည်းဆုံး ၅ ဦး သေဆုံးပြီး ကား ၁ စီး မိုင်းထိမှန်ပျက်စီးကာ လမ်းဘေး​ချောက်အတွင်း ထိုးကျသွားတယ်လို့ ဆိုပါတယ်။

ဧပြီ ၂၅ ရက် မနက် ၁၀ နာရီလောက်ကလည်း နတ်ချောင်းရွာကတဆင့် တောင်ပိုင်းကို ဦးတည်ထွက်ခွာလာတဲ့ စစ်ကောင်စီတပ်ကို ချောင်းခွရွာနားမှာ PDF (Kalay)၊ CNDF၊ RKDF နဲ့ ပ.က.ဖ ပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့ရာမှ ညနေ ၃ လောက်အထိ တိုက်ပွဲ ပြင်းထန်ခဲ့တယ်လို့ ကလေး PDF တပ်ဖွဲ့ဝင် ပြောပါတယ်။

တိုက်ပွဲအတွင်း စစ်ကောင်စီတပ်သား အနည်းဆုံး ၈ ဦးလောက် သေဆုံးသွားပြီး ပူးပေါင်းတပ်ဖွဲ့တွေဘက်က ပ.က.ဖ ရဲဘော် ၁ ဦး ကျဆုံးကာ ၂  ဦး ဒဏ်ရာရရှိခဲ့တယ်လို့ ပြောပါတယ်။

တချိန်တည်းမှာ နတ်​ချောင်းရွာ နဲ့ ချောင်းခွရွာဘက်မှ အောင်ချမ်းသာရွာဘက်ကို ဖောက်ထွက် မောင်းနှင်လာတဲ့ စစ်ကောင်စီတပ်ရဲ့  ကား ၁ စီး နဲ့ ဆိုင်ကယ် ၁၅ စီးလောက်ကို ပန်းမွန်​ချောင်းတံတားနားမှာ နေ့လယ် ၁ နာရီ လောက် ကလေး PDF တပ်ဖွဲ့တွေက မိုင်းဆွဲတိုက်ခိုက်ခဲ့ရာ ဆိုင်ကယ်တွေ အကုန်လုံးနီးပါး ထိမှန်ကာ အများအပြား သေဆုံးနိုင်ပေမဲ့ သီးခြား အတည်မပြုနိုင်ခဲ့ဘူးလို့ ဆိုပါတယ်။

ဒါ့အပြင် နတ်ချောင်းရွာဘက်မှ ဆက်လက်ထွက်ခွာလာတဲ့ စစ်ကောင်စီယာဉ်တန်းကို ညနေ ၃ နာရီလောက် ချောင်းခွရွာ နဲ့ အောင်ချမ်းသာရွာကြားမှာ ကလေး PDF တပ်ဖွဲ့တွေက ထပ်မံမိုင်းဆွဲတိုက်ခိုက်ခဲ့ရာ စစ်ကားကြီး ၁ စီး ပျက်စီးသွားပြီး အများအပြား ထိခိုက်သေဆုံးနိုင်တယ်လို့ ကလေး PDF က ထုတ်ပြန်ပါတယ်။

တိုက်ပွဲဖြစ်ပွားပြီးနောက်မှာ စစ်ကောင်စီတပ်တွေဟာ ရှေ့ဆက်မတိုးနိုင်ဘဲ နတ်ချောင်း၊ ချောင်းခွနဲ့ အောင်ချမ်းသာရွာက နေအိမ်တွေကို မီးရှို့ဖျက်ဆီးပြီး ဆက်လက်တပ်စွဲထားတယ်လို့ သိရပါတယ်။

လက်တလော အဲဒီရွာတွေက ဒေသခံတွေဟာ ဘေးလွတ်ရာ တောတောင်တွေမှာ ထွက်ပြေးတိမ်းရှောင်နေရပြီး နေထိုင်စားသောက်ရေး အခက်အခဲတွေ ဖြစ်ပေါ်နေကြတယ်လို့ ဒေသခံတွေက ပြောပါတယ်။

ကလေးမြို့နယ်ထဲမှာ ၂ ရက်ဆက်တိုက် တိုက်ပွဲဖြစ်စဉ်နဲ့ပတ်သက်လို့ စစ်ကောင်စီဘက်က ထုတ်ပြန်တာ မရှိသေးသလို ကျဆုံးဒဏ်ရာရ စာရင်းကိုလည်း သီးခြားအတည်မပြုနိုင်သေးပါဘူး။