ကုလသမဂ္ဂ အတွင်းရေးမှူးချုပ် အန်တိုနီယို ဂုတားရဲ့စ်ဟာ ယူကရိန်းသမ္မတ ဗိုလိုဒီမာ ဇလန်းစကီးနဲ့ ဧပြီ ၂၈ ရက်က တွေ့အပြီး ယူကရိန်းမှာ ငြိမ်းချမ်းရေး ပြန်ရဖို့နဲ့ အပစ်အခတ်ရပ်စဲဖို့ ဆော်ဩလိုက်ပါတယ်။

ယူကရိန်းသမ္မတ နန်းတော်မှာ ကျင်းပတဲ့ သမ္မတနဲ့ ပူးတွဲ သတင်းစာရှင်းလင်းပွဲအတွင်း ဂုတားရဲ့စ်က အခုလို ပြောလိုက်တာပါ။

ကုလသမဂ္ဂဟာ ယူကရိန်းကို ငွေသား၊ စားနပ်ရိက္ခာ၊ ဆေးဝါးအထောက်အပံ့ အပါအဝင် လူသားချင်းစာနာမှု အကူအညီ ပုံစံမျိုးစုံ တိုးချဲ့ ပံ့ပိုးပေးနေတယ်၊ ပဋိပက္ခ အဆုံးသတ်ဖို့ မေတ္တာရပ်ခံတယ်လို့လည်း သူက ပြောပါတယ်။

နိုင်ငံတကာ ဥပဒေနဲ့ ကုလသမဂ္ဂ ပဋိညာဉ်စာတမ်းတို့နဲ့ အညီ စစ်ပွဲ အဆုံးသတ်ရမယ်၊ ငြိမ်းချမ်းရေး တည်ဆောက်ရမယ်လို့လည်း သူက ပြောပါတယ်။

ယူကရိန်းသမ္မတ ဇလန်းစကီးကလည်း မာရီယူပို ဆိပ်ကမ်းမြို့က အာဇော့ဗ်စတယ် စက်ရုံကနေ အရပ်သားတွေကို ကယ်ထုတ်ရေးအတွက် ယူကရိန်းဟာ ရုရှားနဲ့ ဆွေးနွေးဖို့ အဆင်သင့်ပဲလို့ ပြောပါတယ်။

ဒါ့အပြင် အပစ်အခတ် ရပ်စဲရေးနဲ့ ငြိမ်းချမ်းရေးအတွက် ဂုတားရဲ့စ်ရဲ့ ကြားဝင်ဖျန်ဖြေမှုကို မျှော်လင့်နေတယ်လို့လည်း ဇလန်းစကီးက ပြောခဲ့ပါတယ်။