ဗီယက်နမ် ဆီးဂိမ်းပြိုင်ပွဲမှာ ရွှေတံဆိပ်ရတဲ့ အားကစားသမား တဦးချင်းကို  ငွေကျပ်သိန်း ၃၀၀ ချီးမြှင့်မှာဖြစ်ပြီး မြန်မာ့ အားကစားသမိုင်းတွင် မှတ်တမ်းတင်နိုင်ရေး အစွမ်းကုန် ကြိုးပမ်းယှဉ်ပြိုင်သွားကြဖို့ အာဏာသိမ်း စစ်ခေါင်းဆောင်က ပြောကြားလိုက်ပါတယ်။ 

ဗီယက်နမ်နိုင်ငံက အိမ်ရှင်အဖြစ်  ကျင်းပမယ့်  (၃၁)ကြိမ်မြောက် အရှေ့တောင်အာရှအားကစား ပြိုင်ပွဲသို့ ဝင်ရောက်ယှဉ်ပြိုင်မယ့်  မြန်မာအားကစားအဖွဲ့တွေကို အောင်နိုင်ရေးအလံအပ်နှင်းခြင်း အခမ်းအနား ဧပြီ ၂၉ ရက်က နေပြည်တော်ရှိ ဝဏ္ဏသိဒ္ဓိ အားကစားရုံမှာ  ကျင်းပရာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြောကြားခဲ့တာပါ။

နိုင်ငံတော်အနေနဲ့ အခုနှစ် ဆီးဂိမ်းပြိုင်ပွဲဝင် ဆုရအားကစားသမားတွေအတွက် ရွှေတစ်ဦးချင်း ငွေကျပ်သိန်း ၃၀၀၊ ငွေတစ်ဦးချင်း ငွေကျပ်သိန်း ၂၀၀၊ ကြေးတစ်ဦးချင်း ငွေကျပ် သိန်း ၁၀၀၊ ရွှေအသင်းလိုက်တစ်ဦးချင်းငွေကျပ်သိန်း ၁၀၀၊ ငွေအသင်းလိုက်တစ်ဦးချင်း ငွေကျပ်သိန်း ၇၀၊ ကြေးအသင်းလိုက်တစ်ဦးချင်း ငွေကျပ် ၃၅ သိန်း ချီးမြှင့်မယ်လို့ဆိုပါတယ်။

နည်းပြတွေ အတွက် ရွှေတံဆိပ်ဆုရအားကစားနည်းမှ နည်းပြတစ်ဦးလျှင် ငွေကျပ်သိန်း ၁၀၀၊ ငွေတံဆိပ်ဆုရအားကစားနည်းမှ နည်းပြတစ်ဦးလျှင် ငွေကျပ်သိန်း ၅၀၊ ကြေးတံဆိပ် ဆုရအားကစား နည်းမှ နည်းပြတစ်ဦးလျှင် ငွေကျပ်သိန်း ၃၀၊ အုပ်ချုပ်မှုအဖွဲ့များအတွက် ရွှေတံဆိပ်ဆုရ အားကစားနည်းမှ အုပ်ချုပ်မှုအဖွဲ့ တစ်ဖွဲ့လျှင် ငွေကျပ်သိန်း ၁၀၀၊ ငွေတံဆိပ် ဆုရအားကစားနည်းမှ အားကစားနည်းမှအုပ်ချုပ်မှုအဖွဲ့တစ်ဖွဲ့လျှင် ငွေကျပ် သိန်း ၅၀၊ ကြေးတံဆိပ်ဆုရအားကစားနည်းမှ အုပ်ချုပ်မှုအဖွဲ့ တစ်ဖွဲ့လျှင် ငွေကျပ် သိန်း ၃၀ တို့အား ပေးအပ်ချီးမြှင့်မယ်လို့လည်းဆိုပါတယ်။

သွားရောက်ယှဉ်ပြိုင်မယ့် အားကစားအဖွဲ့တွေအနေနဲ့ အရင်က ပါဝင်ယှဉ်ပြိုင်ခဲ့တဲ့ အကြိမ်တွေထက် ဆုတံဆိပ်တွေ ပိုမိုရရှိအောင် စွမ်းဆောင်ပေးနိုင်ကြမယ်ဆိုရင် မြန်မာအားကစားအဖွဲ့ရဲ့ အောင်မြင်မှုသမိုင်းကို ပိုမိုပြောင်းလဲမှတ်တမ်းတင်နိုင်မှာဖြစ်တယ်လို့လည်း စစ်ခေါင်းဆောင်က ပြောပါတယ်။

ဗီယက်နမ်နိုင်ငံမှာ မေလ ၁၂ ရက်မှ ၂၃ ရက်အထိ ကျင်းပသွားမယ့် ဆီးဂိမ်းစ်ပြိုင်ပွဲမှာ မြန်မာနိုင်ငံကိုယ်စားပြု ပြိုင်ပွဲဝင်မယ့်  အားကစားသမား ၂၉၃ ဦးဟာ အားကစားနည်း ၂၀ မှာ ဝင်ရောက်ယှဉ်ပြိုင်မယ်လို့ စစ်ကောင်စီပြန်ကြားရေးက သတင်းထုတ်ထားပါတယ်။

ဆီးဂိမ်းစ်ပြိုင်ပွဲတွေမှာ မြန်မာနိုင်ငံရဲ့ ဆုတံဆိပ်ရရှိမှုနဲ့ အားကစား အဆင့်အတန်းဟာ ကျဆင်းလာနေတာခဲ့တာ  နှစ်ပေါင်းများစွာရှိနေပြီဖြစ်ပါတယ်။

Photo-MOI