ချဲလ်ဆီးအသင်းကို ပရိသတ်တွေ ဂုဏ်ယူနိုင်အောင် လုပ်ဆောင်ပေးသွားမယ်လို့ ပိုင်ရှင်သစ် တော့ဒ်ဘိုလေက ပြောပါတယ်။ 

ပိုင်ရှင်ဟောင်းဖြစ်သူ ရုရှားစီးပွားရေးလုပ်ငန်းရှင် အေဗရာမိုဗစ်ကို  ဗြိတိန်အစိုးရက စီးပွားရေးပိတ်ဆို့မှုတွေ လုပ်ဆောင်ခဲ့ပြီးနောက် အသင်းကို ရောင်းချဖို့ ဆုံးဖြတ်ခဲ့ရတာပါ။ 

ချဲလ်ဆီးအသင်းကို အမေရိကန်စီးပွားရေးလုပ်ငန်းရှင် တော့ဒ်ဘိုလေက ပေါင် ၄.၂၅ ဘီလီယံနဲ့ အပြီးသတ်ဝယ်ယူနိုင်ခဲ့တာပါ။ 

ဗြိတိန်အစိုးရရဲ့ တရားဝင်ခွင့်ပြုချက်လည်းရရှိခဲ့တဲ့ ချဲလ်ဆီးအသင်းဟာ အပြောင်းအရွှေ့ကိစ္စရပ်တွေကို လွတ်လွတ်လပ်လပ် လုပ်ဆောင်နိုင်ပြီဖြစ်ပါတယ်။ 

“ချဲလ်ဆီးအသင်းကို ထိန်းသိမ်းစောင့်ရှောက်ရတဲ့သူတွေ ဖြစ်လာတဲ့အပေါ်မှာ ကျနော်တို့ ဂုဏ်ယူပါတယ်။ ပွဲတိုင်း၊ မိနစ်တိုင်းမှာ ရာနှုန်းပြည့် အာရုံစိုက်လုပ်ဆောင်သွားပါမယ်။ အသင်းပိုင်ရှင်တွေအနေနဲ့ ကျနော်တို့ရဲ့ ရည်ရွယ်ချက်ကတော့ ပရိသတ်တွေကို ဂုဏ်ယူနိုင်အောင် လုပ်ဆောင်ပေးဖို့ဆိုတာ ရှင်းပါတယ်” လို့ ပိုင်ရှင်သစ်ဖြစ်သူ တော့ဒ်ဘိုလေက ပြောပါတယ်။ 

ရေရှည်အတွက် လူငယ်အသင်းကို တိုးတက်လာအောင် လုပ်ဆောင်ရမှာဖြစ်သလို အသင်းရဲ့အောင်မြင်မှု သမိုင်းကြောင်းအပေါ်မှာလည်း ရင်းနှီးမြှုပ်နှံမှုတွေ ဆက်လက်လုပ်ဆောင်သွားမယ်လို့ ပိုင်ရှင်သစ် တော့ဒ်ဘိုလေက ပြောသွားခဲ့ပါတယ်။