အခုနှစ် အပြောင်းအရွှေ့စျေးကွက်မှာ ငွေကြေးပိုမိုသုံးစွဲသွားမယ်လို့ မန်စီးတီးအသင်းဥက္ကဋ္ဌ အယ်မူဘာရတ်က ပြောသွားပါတယ်။ 

မန်စီးတီးအသင်းဟာ ဒေါ့မွန်တိုက်စစ်မှူး ဟာလန်းကို စာချုပ်ဖျက်သိမ်းကြေး ပေါင် ၅၁ သန်း ပေးချေပြီး ခေါ်ယူခဲ့ပေမယ့် လိုအပ်နေတဲ့နေရာတွေမှာ ကစားသမား အင်အားထပ်မံ ဖြည့်တင်းသွားမယ်လို့ အသင်းဥက္ကဋ္ဌ ကအတည်ပြုသွာခဲ့တာပါ။ 

“ကစားသမားသစ်တွေ ထပ်ရောက်လာဦးမယ်ဆိုတာ ကျနော်အတည်ပြုနိုင်ပါတယ်။ ကျနော်တို့ အသင်းမှာ အားဖြည့်ဖို့လိုအပ်နေတဲ့ နေရာတွေမှာ ဖြည့်တင်းမှုတွေလုပ်ဖို့အတွက် စီစဉ်နေပါတယ်။ ရာသီတိုင်းမှာ ကစားသမားတချို့ ထွက်တာရှိသလို အသင်းကို သွေးသစ်လောင်းရတာတွေလည်း ရှိပါတယ်။ အသင်းရဲ့ခြေစွမ်း တိုးတက်လာဖို့နဲ့ ကစားသမားအင်အားကောင်းမွန်ဖို့ဆိုတာ ကျနော် တို့ အမြဲတမ်း လုပ်ဆောင်ခဲ့တဲ့အရာပါ” လို့ အသင်းဥက္ကဋ္ဌ အယ်လ်မူဘာရတ်က ပြောပါတယ်။ 

နည်းပြ ဂွါဒီယိုလာဟာ မန်စီးတီးနဲ့ တနှစ်သက်တမ်းသာ ကျန်ရှိတော့တာကြောင့် သက်တမ်းတိုးဖို့ ပြင်ဆင်ထားတယ်လို့လည်း အသင်းဥက္ကဋ္ဌ အယ်လ်မူဘာရက်က အတည်ပြုသွားခဲ့ပါတယ်။