ယူကရိန်းနိုင်ငံတောင်ပိုင်း မာရီယူပိုးမြို့ကို ရုရှားက သိမ်းပိုက်တာခံရအပြီး လမ်းတွေ ပြန်အသက်ဝင်နေတာကို မေ ၃၀ ရက်က တွေ့ရပါတယ်။

ဒေသခံတွေက မီးစက်တွေကနေ လျှပ်စစ်ပစ္စည်းတွေကို အားသွင်းနေပြီး လမ်းဘေးစျေးတွေမှာ စားစရာနဲ့ အဝတ်အထည်တွေကို လဲလှယ်နေကြပါတယ်။ စားနပ်ရိက္ခာအတွက် တန်းစီနေပုံကို ရုရှားအစိုးရ ရုပ်သံက ရိုက်ကူးထုတ်လွှင့်ခဲ့ပါတယ်။

ဆိုးဆိုးရွားရွား ပျက်စီးနေတဲ့ အဆောက်အအုံတွေဘေးမှာ ရုရှားလိုလားတဲ့ စစ်ပွဲရဲ့ သင်္ကေတ Z တံဆိပ် ခတ်နှိပ်ထားတဲ့ သေတ္တာတွေထဲမှာ မရှိမဖြစ် ကုန်စည်တွေကို ကောက်ယူနေတဲ့ ဒေသခံ တချို့ကိုလည်း တွေ့ရပါတယ်။

တခြားလူတွေကတော့ ဟင်းသီးဟင်းရွက်တွေနဲ့ ဖိနပ်တွေအပါအဝင် ကုန်စည်တွေကို ရောင်းချ လဲလှယ်ဖို့ သူတို့ ဆိုင်တွေကို ခင်းကျင်းနေကြပါတယ်။

မြို့ထဲမှာ လုယက်ခံရအပြီး ကုန်စည်နည်းနည်းသာ ကျန်တယ်လို့ အမျိုးသမီး တယောက်က ပြောပါတယ်။

အာဇော့ဗ်ပင်လယ်နားက အာဇော့ဗ်စတယ် သံမဏိစက်ရုံထဲမှာ အဝိုင်းခံရတဲ့ ယူကရိန်း တိုက်ခိုက်ရေးသမား အယောက် ၂၄၀၀ ကျော် လက်နက်ချခဲ့အပြီးမှာ ရုရှားဟာ မာရီယူပိုးမြို့ကို အရင်အပတ်က အပြည့်အဝ ထိန်းချုပ်လိုက်တာပါ။

ဒီမြို့ကို ရုရှားအစိုးရက သိမ်းပိုက်လိုက်နိုင်တာဟာ အာဇော့ဗ်ပင်လယ် ကမ်းရိုးတန်းကို အပြည့်အဝ ထိန်းချုပ်နိုင်ရေး ကူညီပေးတဲ့အပြင် ရုရှားကုန်းမကြီးနဲ့ ခရိုင်းမီးယား ကျွန်းဆွယ်ကို ချိတ်ဆက်ထားတဲ့ မြေကို ဖန်တီးလိုက်နိုင်တာပါ။

ယူကရိန်း သမ္မတ ဇလန်းစကီးကတော့ မာရီယူပိုးမြို့ လုံးဝ ဖျက်ဆီးခံလိုက်ရပြီ လို့ ပြောပါတယ်။ ဒါပေမဲ့ မြို့ကို ပြန်တည်ဆောက်မယ်လို့ ရုရှား အစိုးရက ကတိပြုထားပါတယ်။

မြို့ရဲ့ နေရာအများစုမှာ မီးလောင်နေပြီး လူနေရပ်ကွက်တွေကို ပစ်မှတ်ထားခဲ့တယ်လို့ နှစ် ဖက်စလုံးက အပြန်အလှန် စွပ်စွဲခဲ့ပါတယ်။