ယူကရိန်းနိုင်ငံအရှေ့ပိုင်းက လီမန်မြို့ကို အပြည့်အဝ ထိန်းချုပ်ပြီးပြီလို့ ရုရှားကာကွယ်ရေး ဝန်ကြီးဌာနက မေ ၂၈ ရက်မှာ ပြောလိုက်ပါတယ်။

ဒီမြို့ဟာ ဆေဗယ်ရိုဒန်ညက်စ်မြို့ အနောက်ဘက်က ရထားလမ်းဆုံ အချက်အခြာ မြို့ပါ။

ဒန်ညက်စ်ပြည်သူ့သမ္မတနိုင်ငံ ပြည်သူ့စစ်တပ်ဖွဲ့တွေနဲ့ ရုရှားစစ်တပ်တို့ ပူးပေါင်းရလဒ်ကြောင့် ဒီမြို့ကို သိမ်းပိုက်နိုင်တာလို့ ရုရှားကာကွယ်ရေးဝန်ကြီးဌာန ပြောခွင့်ရ အစ်ဂေါ ကိုနာရှန်ကို့ဗ်က ပြောပါတယ်။

“လေတပ်က ယူကရိန်း ဂျက်လေယာဉ် ၂ စီးကို ပစ်ချခဲ့တယ်။ စစ်ဆင်ရေးအတွင်း ရုရှား ကာကွယ်ရေးတပ်က ရဟတ်ယာဉ်တစီးကို ပစ်ချခဲ့တယ်” လို့ သူက အခိုင်အမာ ပြောပါတယ်။

လီမန်မြို့အတွက် ယူကရိန်းနဲ့ ရုရှားတို့ ရက်အတော်ကြာကြာ တိုက်ခဲ့ကြတာပါ။

မေ ၂၇ ရက်မှာတော့ ရုရှားဟာ လီမန်မြို့ တမြို့လုံး နီးပါးကို သိမ်းပိုက်ခဲ့ပြီး ယူကရိန်းတပ်တွေက မြို့ အနောက်တောင်ဘက် ၁၂ မိုင်အကွာ စလိုဗန့်စ်ခ်မြို့ကို ထိုးစစ်မဆင်နိုင်အောင် ပိတ်ဆို့ ထားတယ်လို့ ယူကရိန်းအစိုးရက ပြောပါတယ်။

ဘတ်ဟွတ်နဲ့ ဆိုလေဒတ်မြို့က ယူကရိန်းကွပ်ကဲရေးစခန်းတွေကို ဖျက်ဆီးဖို့ ဒုံးကျည်တွေ သုံးခဲ့တယ်လို့ ရုရှားက မေ ၂၇ ရက်က ပြောခဲ့ပါသေးတယ်။

ဒီမြို့တွေဟာ ရုရှား ထိုးစစ်စိပ်စပ် ဆင်နွှဲနေတဲ့ ဆေဗေရိုဒန်ညက်စ်မြို့နဲ့ လီစီချန့်ခ်စ်မြို့တွေရဲ့ အနောက်တောင်ဘက်က ဗျူဟာမြောက် အရေးပါတဲ့ လမ်းပေါ်မှာ ရှိပါတယ်။

ရုရှားရဲ့ ပြောဆိုချက်တွေကို သီးခြား လွတ်လွတ်လပ်လပ် စစ်ဆေး အတည်ပြုတာတော့ မလုပ်နိုင်သေးပါဘူး။ 

ရုရှားစစ်တပ်ဟာ ယူကရိန်းနိုင်ငံရဲ့ တခြား အစိတ်အပိုင်းတွေမှာ ယူကရိန်းစစ်တပ်ရဲ့ အကြမ်းစား ခံစစ်ကို ရင်ဆိုင်ရအပြီး ကိယက်ဗ်မြို့ကို တိုက်ခိုက်နေရာက စွန့်ခွာခဲ့ပါတယ်။

အဲဒီနောက် ဒွန်ဘတ်စ်ဒေသကို အာရုံစိုက် တိုက်ခိုက်နေပါတယ်။

ရုရှားက ယူကရိန်း စစ်အင်အားနဲ့ ရုရှားစကားပြောသူတွေကို အမျိုးသားရေးဝါဒီတွေက ခြိမ်းခြောက်မှုတွေကို လျှော့ချဖို့ အထူးစစ်ဆင်ရေး ဆင်နွှဲတယ်လို့ ပြောထားပါတယ်။

ယူကရိန်းနဲ့ အနောက်နိုင်ငံတွေကတော့ ရုရှားရဲ့ စကားဟာ ယူကရိန်းကို တိုက်ခိုက်ဖို့ မူမမှန်တဲ့ အကြောင်းပြချက်တွေလို့ ပြောခဲ့ကြပါတယ်။