ရခိုင်ပြည်နယ်၊ စစ်တွေမြို့မှ ဘင်္ဂလားဒေ့ရှ်နိုင်ငံသို့ ကုန်ပို့ဆောင်တဲ့ စက်လှေတစီး  မေလ ၃၀ ရက်မနက်က နတ်မြစ်ဝမှာ နစ်မြုပ်ခဲ့လို့  ကုန်ပစ္စည်းတန်ဖိုးကျပ်  သိန်း ၃၀၀ ဖိုးလောက် ဆုံးရှုံးသွားတယ်လို့ စက်လှေပိုင်ရှင်ထံကနေ သိရပါတယ်။

အဆိုပါစက်လှေမှာ ကုန်ပစ္စည်း ၃၅ တန်တင်ဆောင်ပြီး စစ်တွေမြို့မှ မေ ၂၉ ရက် ညနေ ၅ နာရီက စတင် ထွက်ခွာလာခဲ့ပြီး မောင်တောမြို့နယ် မကျီးချောင်းဝ စခန်းအနောက်ဘက် နတ်မြစ်ဝ အတွင်း မေလ ၃၀ ရက် မနက်က သောင်ခုံနဲ့ ရိုက်မိပြီးစက်လှေရဲ့ ဝမ်းဗိုက်ပျဉ်ပြား ပွင့်ထွက်နစ်မြုပ်ခဲ့တာပါ။

စက်လှေပိုင်ရှင် ဦးအုန်းဖေက " ဆုံးရှုံးမှုကတော့ သိန်း ၃၀၀ ဖိုးလောက်ရှိတယ်။ အဓိက နှစ်မြုပ်ရတာက သဲခုံနဲ့တိုက်မိပြီး နစ်မြုပ်သွားခဲ့တာ။ ကုန်ပစ္စည်တွေက ချင်း၊ ဇီးယို ပစ္စည်စုံပါတယ်။"လို့  ပြောပါတယ်။

ထိုစက်လှေနစ်မြုပ်တဲ့နေရာကို  သက်ဆိုင်ရာနယ်မြေစခန်းက တာဝန်ရှိသူတွေ အချိန်မီသွားရောက်ကယ်ဆယ်နိုင်ခဲ့တဲ့အတွက်  လှေလုပ်သား ၆ ဦး အသက်ဘေးက လွတ်မြောက်ခဲ့ပြီး လက်ရှိ နစ်မြုပ်သွားတဲ့ စက်လှေအားကို ဖော်ယူရရှိဖို့ ကြိုးစားနေတယ်လို့ မကျည်းချောင်းစခန်းတာဝန်ရှိသူတွေက ပြောပါတယ်။

အဆိုပါစက်လှေဟာ ကုန်ပစ္စည်းမျိုးစုံ ၃၅ တန်ကို ဘင်္ဂလားဒေ့ရှ်နိုင်ငံသို့ စစ်တွေမှ နယ်စပ်ကုန်သွယ်ရေးအဖြစ်  တရားဝင်ပို့ဆောင်တာလို့ စစ်တွေကုန်သည်ကြီးများအသင်းကနေ သိရပါတယ်။