မွန်ပြည်နယ်ဝန်ကြီးချုပ် ဒေါက်တာအေးဇံကို အာဏာသိမ်းစစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှုမှာ သက်သေမလာတဲ့အတွက် ရုံးချိန်း ထပ်ရွှေ့လိုက်တယ်လို့ တရားရုံးနဲ့ နီးစပ်သူတွေက ဒီဗွီဘီကို ပြောပါတယ်။

ဝန်ကြီးချုပ် ဒေါက်တာအေးဇံကို စစ်ကောင်စီက စွဲဆိုထားတဲ့ ရွေးကောက်ပွဲ မလျော်သြဇာသုံးမှုဖြစ်တဲ့ ရာဇသတ်ကြီး ဥပဒေ ပုဒ်မ ၁၃၀ (က) အတွက် မေ ၃၁ ရက်က မော်လမြိုင်မြို့နယ် တရားရုံးမှာ ရုံးထုတ်စစ်ဆေးခဲ့တာပါ။

ဒါပေမဲ့ ဒီရုံးချိန်းမှာ တရားခံပြ သက်သေမလာတဲ့အတွက်ကြောင့် စစ်ကောင်စီ တရားသူကြီးက တရားခံပြ သက်သေကို ပယ်ဖျက်လိုက်ပြီးနောက် လာမယ့်ရုံးချိန်းမှာ နှစ်ဖက် လျှောက်လဲချက်ပေးဖို့ အမိန့်ချမှတ်ခဲ့ပါတယ်။

စစ်ကောင်စီက စွဲဆိုထားတဲ့ မွန်ပြည်နယ် ဝန်ကြီးချုပ် ဒေါက်တာအေးဇံရဲ့ ရွေးကောက်ပွဲ မလျော်သြဇာသုံးမှုကို လာမယ့် ဇွန် ၇ ရက်နေ့ ရုံးထုတ်စစ်ဆေးသွားမှာဖြစ်ပြီး ဒီရုံးချိန်းပြီးရင် အမိန့်ချမှတ်သွားဖို့ ရှိတယ်လို့ တရားရုံးနဲ့ နီးစပ်သူတဦးက ပြောပါတယ်။

တဖက်မှာတော့ ဝန်ကြီးချုပ် ဒေါက်တာအေးဇံဟာ စစ်ကောင်စီက စွဲဆိုထားတဲ့ ပုဒ်မ ၁၇၁ (စ) အမှု ၂ မှုအတွက် ထပ်မံ တရားရင်ဆိုင်နေရတာဖြစ်ပြီး ဝန်ကြီးချုပ် ဒေါက်တာအေးဇံဘက်က အဲဒီအမှုအတွက် တရားစွဲခွင့်ပြုမိန့်မပါလို့ အမှုကို ပယ်ဖျက်ပေးဖို့ ပြည်ထောင်စုတရားလွှတ်တော်ချုပ်ရုံးမှာ ချေဖျက်ခွင့် လျှောက်တင်ထားပါတယ်။

ဝန်ကြီးချုပ် ဒေါက်တာအေးဇံကိုတော့ စစ်ကောင်စီက ပြီးခဲ့တဲ့ မေလ ၁၆ ရက်နေ့မှာ အဂတိအမှု ၉ မှုအတွက် ထောင်ဒဏ် ၂၁ အမိန့်ချမှတ်ထားသလို ပြီးခဲ့တဲ့နှစ် ဒီဇင်ဘာလတုန်းကလည်း နိုင်ငံ့ဝန်ထမ်းတွေကို CDM လှုပ်ရှားမှုမှာ ပါဝင်ပေးဖို့ တိုက်တွန်းခဲ့တယ်ဆိုပြီး ထောင်ဒဏ် ၂ အမိန့်မှတ်ထားတာပါ။

ထောင်ဒဏ် ၂၃ နှစ် ချမှတ်ခံထားရတဲ့ ဝန်ကြီးချုပ် ဒေါက်တာအေးဇံကိုတော့ စစ်ကောင်စီက ကျိုက်မရော ဗဟိုအကျဉ်းထောင်မှာ ဖမ်းဆီးချုပ်နှောင်ထားတာဖြစ်ပြီး လတ်တလောမှာတော့ ကျန်းမာရေးကောင်းမွန်နေတယ်လို့ တရားရုံးနဲ့ နီးစပ်သူတွေက ပြောပါတယ်။