တရုတ်နဲ့ ဆွစ်ဇာလန်တို့ကြား လွတ်လပ်စွာ ကုန်သွယ်ရေး သဘောတူညီချက် နောက်ဆုံးအခြေအနေဟာ လက်ဆောင် ဒါမှမဟုတ် မျက်နှာသာပေးမှု မဟုတ်ပေမယ့် “နှစ်ဦးနှစ်ဖက် အကျိုးရှိ” တဲ့ သဘောတူညီချက်တရပ် ဖြစ်တယ်လို့ တရုတ်နိုင်ငံခြားရေးဝန်ကြီးဌာန ပြောခွင့်ရ ကျောက်လိကျန်းက မေ ၃၀ ရက် သတင်းစာရှင်းလင်းပွဲမှာ ပြောလိုက်ပါတယ်။

“လွတ်လပ်သော ကုန်သွယ်ရေး သဘောတူညီချက်ကို အဆင့်မြှင့်တင်တဲ့အတွက် တရုတ်က ဝမ်းသာတယ်။ တချိန်တည်းမှာ ဆွစ်ဇာလန်ဘက်ကလည်း လူသားဝင်ရောက်စွက်ဖက်မှုကို ဖယ်ရှားနိုင်ပြီး တရုတ်ဘက်ခြမ်းကို လမ်းတဝက်မှာ တွေ့ဆုံနိုင်မယ်လို့ မျှော်လင့်တယ်” လို့ ကျောက်လိကျန်းက ဆက်ပြောပါတယ်။

ဆွစ်ဇာလန်အစိုးရက တရုတ်အစိုးရရဲ့ လူ့အခွင့်အရေးမှတ်တမ်းကို ပိုမိုဝေဖန်ရှုမြင်လာတာမို့ တရုတ်နဲ့ ဆွစ်ဇာလန်တို့ရဲ့ လွတ်လပ်စွာ ကုန်သွယ်ရေး သဘောတူညီချက်ကို ပြန်ဆန်းသစ်ဖို့ ဆွစ်ဇာလန်ရဲ့ ကြိုးပမ်းမှုတွေ ရပ်တန့်သွားခဲ့ကြောင်း ဆွစ်ဇာလန်သတင်းစာတွေက မေ ၂၉ ရက်မှာ ဖော်ပြခဲ့ကြပါတယ်။

ဆွစ်ဇာလန်နိုင်ငံဟာ သူ့ထုတ်ကုန်တွေအတွက် အကောက်ခွန်လျှော့ချမှု သက်တမ်းတိုးရေး သဘောတူညီချက်ကို မွမ်းမံပြင်ဆင်ဖို့နဲ့ ရေရှည်တည်တံ့မှုဆိုင်ရာ အင်္ဂါရပ်တွေ ပါဝင်နိုင်ရေးအတွက် သဘောတူညီချက်ကို တိုးချဲ့ဖို့ ကြိုးပမ်းနေပေမဲ့ တရုတ်အစိုးရက စိတ်မဝင်စားဘူးလို့ သတင်းစာတွေက ဖော်ပြကြပါတယ်။