ကေအန်ယူရဲ့ အုပ်ချုပ်ရေးလုပ်ငန်းတွေမှာ ဝင်ရောက်စွက်ဖက် နှောင့်ယှက်တာတွေ ရပ်တန့်ဖို့ စစ်ကောင်စီလက်အောက်ခံ ဗိုလ်မှူးချုပ်တယောက်ကို ကရင်အမျိုးသားလွတ်မြောက်ရေး တပ်မတော် (KNLA) က သတိပေးလိုက်ပါတယ်။ 

စစ်ဆင်ရေးကွပ်ကဲမှုဌာနချုပ် စကခ ၂၀ က ဗိုလ်မှူးချုပ်ကိုကိုလွင်ကို  KNLA က အထူး သတိပေးလိုက်တဲ့ အကြောင်း  တပ်မဟာ ၂ ဌာနချုပ်ကနေ  ၆ လပတ် တပ်မှူးများအစည်းအဝေးအပြီး ဇွန် ၃ ရက်က ထုတ်ပြန် ကြေညာခဲ့တာ ဖြစ်ပါတယ်။

ပြည်သူလူထုရဲ့ လုပ်ငန်းခွင်သွားလာရေးနဲ့ ကုန်စည်ရိက္ခာ သယ်ယူပို့ဆောင်ရေးတွေကို စစ်ကောင်စီက နှောင့်ယှက်ဟန့်တား စစ်ဆေးနေတာတွေ ရပ်တန့်ဖို့ကိုလည်း သတိပေးထားပါတယ်။

တောင်ငူခရိုင် တပ်မဟာ ၂ နယ်မြေထဲမှာ ရှိပြီးသားဖြစ်တဲ့ ကေအန်ယူရဲ့ အုပ်ချုပ်ရေးဆိုင်ရာ လုပ်ငန်းတွေနဲ့ ပညာရေး၊ ကျန်းမာရေး၊ သဘာဝပတ်ဝန်းကျင်နဲ့ သယံဇာတ ထိန်းသိမ်းကာကွယ်ရေး၊ လူသားချင်း စာနာထောက်ထားမှုဆိုင်ရာ အကူအညီပေးတာ၊ တရားစီရင်ရေး၊ သစ်တောနဲ့ လယ်ယာကိစ္စရပ်တွေ၊ အခွန်တော်နဲ့ ဘဏ္ဍာရေးဆိုင်ရာ ကိစ္စရပ်တွေ စတဲ့ ဌာနဆိုင်ရာကိစ္စအဝဝကို စစ်ကောင်စီက ဝင်ရောက်နှောင့်ယှက် စွက်ဖက်တာမလုပ်ဖို့ သတိပေး ထုတ်ပြန်လိုက်တာပါ။

ဒါတွေကို ဆက်လုပ်နေရင် ဖြစ်လာမယ့်အကျိုးဆက်တွေကို တာဝန်မယူဘူးလို့လည်း ဆိုထားပါတယ်။

တောင်ငူခရိုင် ကေအန်ယူ တပ်မဟာ ၂ ဟာ ပြည်သူလူထုရဲ့ အသက်အိုးအိမ်စည်းစိမ်နဲ့ လုံခြုံရေးကို အထူးအလေးထား အကာအကွယ်ပေးတဲ့အပြင် ကေအန်ယူ ဗဟိုဌာနချုပ်နဲ့ KNLA  ဌာနချုပ်တို့ရဲ့ နိုင်ငံရေး စစ်ရေး ဦးဆောင်မှုတွေအတိုင်း ခံယူလုပ်ဆောင်တယ်လို့ ဆိုပါတယ်။

ကေအန်ယူနဲ့ စစ်ကောင်စီတပ်တွေအကြား အခုသီတင်းပတ်တွေအတွင်း မကြာခဏ ထိတွေ့ ပစ်ခတ်တိုက်ပွဲတွေ ဖြစ်ပွားနေတာဖြစ်ပါတယ်။