ဗြိတိန်မှာ အဲလစ်ဇဘက်ဘုရင်မကြီးရဲ့ ထီးနန်းစံသက် ပလက်တီနမ်ရတုအထိမ်းအမှတ် အခမ်းအနားတွေကို ဆက်လက်ကျင်းပနေချိန်မှာ ဇွန် ၃ ရက်က ဗြိတိန်အိမ်ရှေ့စံ တော်ဝင်မင်းသား ချားလ်စ်နဲ့ ကြင်ယာတော် ကွန်ဝေါလ်မြို့စားကတော် ကမီလာတို့ဟာ နေ့လယ်စာ ဧည့်ခံပွဲကို ရောက်ရှိလာပါတယ်။ 

အိမ်ရှေ့မင်းသားချားလ်နဲ့ သူ့ကြင်ယာတော် ကမီလာတို့ရဲ့ နောက်မှာ မင်းသားဝီလျံနဲ့ ကြင်ယာတော် ကိတ်၊  ဇာရာတင်ဒဲလ်နဲ့ သူ့ခင်ပွန်း မိုက်ခ်တင်ဒဲလ်၊ ဝက်ခ်ဆက်စ်မြို့စားနဲ့ မြို့စားကတော် ဆိုဖှီနဲ့ သူတို့ကလေးတွေ အပါအဝင် တခြားထိပ်တန်းတော်ဝင် မိသားစုတွေ လိုက်ပါလာကြပါတယ်။ 

မင်းသမီး ဘီးထရစ်စ်နဲ့ မင်းသမီး ယူဂျင်း တို့လည်း သူတို့ခင်ပွန်းတွေနဲ့အတူ ခန်းမအတွင်း ရောက်ရှိလာကြသလို တော်ဝင်မိသားစုတွေနဲ့အတူ နိုင်ငံရေးသမားတွေလည်း ပါဝင်ခဲ့ကြပါတယ်။

ဧည့်သည်တော်တွေထဲမှာ ဗြိတိန်ဝန်ကြီးချုပ် ဘောရစ်ဂျွန်ဆင်၊ ပြည်ထဲရေးဝန်ကြီး ပရီတီပါတလ်နဲ့ အလုပ်သမားပါတီ အတိုက်အခံခေါင်းဆောင် ကေရာ စတာမာတို့လည်း ပါဝင်ပါတယ်။

ဒီဧည့်ခံပွဲကို အဲလစ်ဇဘက်ဘုရင်မကြီးရဲ့ နန်းတက်မှုကို ဂုဏ်ပြုသောအားဖြင့် လန်ဒန်ရှိ စိန့်ပေါလ် ကက်သီဒြယ် ဘုရားရှိခိုးကျောင်းမှာ ကျေးဇူးတော်ချီးမွမ်းခြင်း အခမ်းအနားအပြီးမှာ ကျင်းပတာ ဖြစ်ပါတယ်။  

ဘုရင်မကြီးကတော့ သူ့ရဲ့ ဆက်တိုက် အသွားအလာ မလုပ်နိုင်တဲ့ ပြဿနာကြောင့် ဒီဧည့်ခံပွဲကို မတက်ရောက်ပါဘူး။

ဇွန် ၂ ရက်က စစ်ရေးပြအခမ်းအနားနဲ့ တော်ဝင်လေတပ် ပျံသန်းမှုအပြီးမှာ အဲလစ်ဇဘက် ဘုရင်မကြီးဟာ ဘာကင်ဟမ်နန်းတော်ရဲ့ လေသာဆောင်ကနေ လူပရိတ်သတ်ကို လက်ဝှေ့ယမ်း နှုတ်ဆက်လိုက်ပြီး ဘုရင်မကြီးရဲ့ နန်းစံသက် ပလက်တီနမ်ရတုကို စတင်ခဲ့တာဖြစ်ပြီး ၄ ရက်ဆက်တိုက် ကျင်းပနေတာ ဖြစ်ပါတယ်။