ယူကရိန်းဟာ အနောက်နိုင်ငံတွေကနေ ပိုအားကောင်းတဲ့ လက်နက်တွေ များများရလေလေ၊ ယူကရိန်းပြည်သူတွေနဲ့ သိမ်းပိုက်ခံနယ်မြေတွေ မြန်မြန်လွတ်မြောက်နိုင်လေလေပဲလို့ ယူကရိန်းသမ္မတ ဗိုလိုဒီမာ ဇလန်းစကီးက ဇွန် ၁၆ ရက်မှာ ပြောကြားလိုက်ပါတယ်။

ပြင်သစ်၊ ဂျာမနီ၊ အီတလီနဲ့ ရိုမေးနီးယား ခေါင်းဆောင်တွေနဲ့ ကိယက်ဗ်မှာ တွေ့ဆုံခဲ့ကြစဉ် ရုရှားအပေါ် နောက်ထပ် ပိတ်ဆို့အရေးယူမှုတွေနဲ့ စစ်ပြီးခေတ် ပြန်လည်တည်ဆောက်ရေး ဖြစ်နိုင်ခြေတွေကို ဆွေးနွေးခဲ့တယ်လို့ သတင်းစာရှင်းလင်းပွဲမှာ ပြောကြားခဲ့ပါတယ်။

ယူကရိန်းဟာ ရုရှားရဲ့ ဖေဖော်ဝါရီ ၂၄ ရက် ကျူးကျော်မှုကို တွန်းလှန်တိုက်ခိုက်ရာမှာ လက်နက်အကူအညီတွေ ပေးပို့တဲ့အတွက် ကျေးဇူးတင်ကြောင်းနဲ့ ခေတ်မီဒုံးကျည် အမြောက်တွေနဲ့ ဒုံးကျည်ကာကွယ်ရေးစနစ်တွေ အပါအဝင် လက်နက်ကြီးတွေကို လက်ခံရရှိဖို့ မျှော်လင့်ထားကြောင်းလည်း ပြောပါတယ်။

ဆုံးဖြတ်ချက်တွေ နှောင့်နှေးတဲ့ နေ့ရက်တိုင်း၊ ဆုံးဖြတ်ချက်တွေကို ရွှေ့ဆိုင်းလိုက်တဲ့ နေ့ရက်တိုင်းဟာ ရုရှားစစ်တပ်တွေအတွက် ယူကရိန်းပြည်သူတွေကို သတ်ဖြတ်ပြီး မြို့ရွာတွေကို ဖျက်ဆီးမယ့် အခွင့်အရေးပါလို့လည်း သမ္မတ ဇလန်းစကီးက ဆိုပါတယ်။

“ယူကရိန်းအပေါ် ရုရှားရဲ့ကျူးကျော်မှုဟာ စည်းလုံးတဲ့ ဥရောပတခွင်လုံးနဲ့ ကျနော်တို့ တယောက်ချင်းစီနဲ့ တန်ဖိုးတွေကို ဆန့်ကျင် ရန်စလိုက်တာလည်းဖြစ်တယ်။”