တရုတ်နိုင်ငံကို အခုနှစ်အတွက် ပထမဆုံး ဝင်ရောက်တိုက်ခတ်တဲ့ တိုင်ဖွန်းမုန်တိုင်းချာဘာကြောင့် တောင်ပိုင်း ကမ်းရိုးတန်းဒေသတွေမှာ မိုးရွာခဲ့ပြီး တချို့နေရာတွေမှာ ရေကြီးရေလျှံခဲ့တယ်လို့ တရုတ်အစိုးရ ရုပ်သံက ဇူလိုင် ၂ ရက်မှာ ပြောပါတယ်။

နိုင်ငံရဲ့  လူဦးရေအများဆုံး ကွမ်တုံပြည်နယ်အပါအဝင် ပြည်နယ်တွေမှာ စံချိန်တင် မိုးရွာပြီး သဘာဝဘေးအန္တရာယ်ဖြစ်နှုန်း မြင့်နိုင်တယ်လို့ မိုးလေ၀သ ပညာရှင်တွေက သတိပေးထားပါတယ်။

ဟိုင်နန်ကျွန်းမှာ နေတဲ့သူတွေကို ရေကြီးရေလျှံတာကနေ ဘေးလွတ်ရာဆီ ရွှေ့ပြောင်းထားရတဲ့ ဗီဒီယိုဖိုင်ကို အစိုးရမီဒီယာက ပြသထားပါတယ်။ 

ဟိုင်နန်ကျွန်းမှာ အရေးပေါ်တုံ့ပြန်မှုကို ဒုတိယအမြင့်ဆုံးအဆင့်အထိ ဇူလိုင် ၂ ရက်မှာ အဆင့်မြှင့်တင်ခဲ့ပါတယ်။ 

ကျွန်းတလျှောက် မီးရထားဝန်ဆောင်မှုကို ရပ်ဆိုင်းခဲ့ပြီး ဟိုက်ခို့နဲ့ စန်းယာမြို့တွေဆီ အသွားအလာ ခရီးစဉ် ၄၀၀ ကျော်ကို ဖျက်သိမ်းခဲ့ရပါတယ်။ 

ထိုင်းလို ခေါင်ရမ်းပန်းလို့ အဓိပ္ပာယ်ရတဲ့ တိုင်ဖွန်းမုန်တိုင်း ချာဘာဟာ ဇူလိုင် ၂ ရက်မွန်းလွဲပိုင်းမှာ ကွမ်တုံပြည်နယ်ရဲ့ မောင်မင်မြို့ ကုန်းတွင်းပိုင်းကို ဝင်ရောက်ပြီးတဲ့နောက် တစ်နာရီကို ၁၀ မိုင်ကနေ ၁၅ မိုင်နှုန်းနဲ့  အနောက်မြောက်ဘက် ဆီရွေ့လျားခဲ့တယ်လို့ အမျိုးသားမိုးလေဝသ ဌာနက ကြေညာချက်ထုတ်ပြန်ပြောဆိုပါတယ်။

ချာဘာမုန်တိုင်းဟာ အင်အား အသင့်အတင့်ရှိပြီး အချိန်ကြာလာတာနဲ့အမျှ အင်အား လျော့နည်းသွားမယ်လို့ မျှော်လင့်ရပေမယ့် အလွန်သည်းသည်းထန်ထန် မိုးရွာနိုင်သေးကာ ဆက်တိုက်မိုးရွာသွန်းမှု စံချိန်သစ်တင်နိုင်တယ်လို့ မိုးလေဝသစင်တာရဲ့ ကြိုတင်ခန့်မှန်းရေး အကြီးအကဲ ကောင်းရွှမ်းကျူ ကပြောပါတယ်။