ရှမ်းပြည် (တောင်ပိုင်း)၊ ဖယ်ခုံမြို့နယ်၊ ရွှေပြည်အေးရွာဘက်မှာ စစ်ကောင်စီတပ်တွေနဲ့ ကရင်နီပူးပေါင်းတပ်ဖွဲ့တွေ  ဇူလိုင် ၄ ရက် မနက်ပိုင်းကတည်းက တိုက်ပွဲတွေဖြစ်ပွားခဲ့တာကြောင့် နှစ်ဖက်ထိခိုက်ကျဆုံးတာတွေရှိနေတယ်လို့ ကရင်နီတပ်ဖွဲ့ထံက သိရပါတယ်။ 

ဖယ်ခုံမြို့နယ် ရွှေပြည်အေးရွာအနီး စစ်ကောင်စီအထိုင်စခန်းနဲ့ လွယ်ပသာကျေးရွာက စစ်ကောင်စီအထိုင်စခန်းကို ကရင်နီပူးပေါင်းတပ်တွေက သွားရောက်တိုက်ခိုက်ခဲ့ရာမှာ တိုက်ပွဲဖြစ်ပွားခဲ့တာ ဖြစ်ပါတယ်။

လွယ်ပသာစခန်းကို သွားရောက်တိုက်ခိုက်တဲ့ ကရင်နီပူးပေါင်းတပ်ကို စစ်ကောင်စီရဲ့ ပင်လောင်းတပ်တွေက စစ်ကူနဲ့ လာရောက်ပြီး နှစ်ဖက်ညှပ်တိုက်ခိုက်ခဲ့လို့ ကရင်နီပူးပေါင်းတပ်က တပ်ဖွဲ့ဝင် ၈ ဦးထက်မနည်း သေဆုံးခဲ့ပြီး အများအပြား ဒဏ်ရာရရှိခဲ့တယ်လို့ ကရင်နီပူးပေါင်းတပ်ဘက်က သိရပါတယ်။ စစ်ကောင်စီဘက်ကလည်း ထိခိုက်သေဆုံးမှုတွေရှိနေပေမဲ့ အရေအတွက် အတိအကျ မသိရသေးပါဘူး။

ဇူလိုင် ၄ ရက် မနက် ၁၀ နာရီခွဲလောက်ကတည်းက စတင်ဖြစ်ပွားခဲ့တဲ့တိုက်ပွဲကြောင့် လွိုင်ကော် - မန္တလေး၊ လွိုင်ကော် - ရန်ကုန်လမ်းမပေါ် ကားတွေ ပိတ်နေခဲ့တယ်လို့ ဒေသခံတွေက ပြောပါတယ်။

တိုက်ပွဲဖြစ်ပွားချိန်အတွင်း လက်နက်ကြီးတွေ ကျရောက်မှုကြောင့်လည်း ဖယ်ခံမြို့ပေါက်က နေအိမ်တချို ထိခိုက်ပျက်စီးခဲ့ပါတယ်။ 

ဇွန် ၁ ရက်မှ ၃၀ ရက်အထိ ၁ လအတွင်း ကရင်နီပြည်နယ်မှာ တိုက်ပွဲပေါင်း ၄၄ ကြိမ်ထက်မနည်း ဖြစ်ပွားခဲ့ပြီး ဖယ်ခုံမြို့နယ်မှာ ၆ ကြိမ်ဖြစ်ပွားခဲ့တယ်လို့ ကရင်နီအရပ်ဘက်အဖွဲ့ရဲ့ မှတ်တမ်းအရ သိရပါတယ်။

ဇွန်လ တလတာ တိုက်ပွဲ ၄၄ ကြိမ်မှာ ဒီးမော့ဆိုမြို့နယ်မှာ ၂၁ ကြိမ်နဲ့ အများဆုံးဖြစ်ပွားခဲ့ပြီး ဖရူဆိုမြို့နယ်မှာ ၁၀ ကြိမ်နဲ့ စစ်ကောင်စီဘက်က ၃၁ ဦးကျဆုံးကာ ကရင်နီပူးပေါင်းတပ်ဘက်က  ၃ ဦး ကျဆုံးခဲ့ကြောင်းလည်း မှတ်တမ်းမှာဖော်ပြပါတယ်။