တောင်ကိုရီးယားနိုင်ငံက K-pop ယောက်ျားလေးဂီတအဖွဲ့ BTS ဟာ စစ်မှုထမ်းနေချိန်မှာ နိုင်ငံရပ်ခြားမှာ ဆက်ဖျော်ဖြေနိုင်တယ်လို့ တောင်ကိုရီးယား ကာကွယ်ရေးဝန်ကြီးက သြဂုတ် ၁ ရက်မှာ ပြောလိုက်ပါတယ်။

K-pop ကြယ်ပွင့်တွေအတွက် မဖြစ်မနေ စစ်မှုထမ်းရမယ့်ကာလကို ၂ နှစ်အစား ၂ ပတ်ကနေ ၃ ပတ်အထိ အတိုချုံးဖို့ ဆွေးနွေးနေကြချိန်မှာ ခုလိုပြောလိုက်တာပါ။

အခုနှစ် ဒီဇင်ဘာလမှာ အသက် ၃၀ နှစ်ပြည့်မယ့် တေးဂီတအဖွဲ့ရဲ့ အသက်အကြီးဆုံးအဖွဲ့ဝင် Jin နဲ့ ဒီပြဿနာကို သိသိသာသာ အာရုံစိုက်လာနေကြတာပါ။

၂၀၁၉ ခုနှစ် ဥပဒေကို ပြန်လည်ပြင်ဆင်မှုအရ ကမ္ဘာတဝန်း အသိအမှတ်ပြုတဲ့ K-pop ကြယ်ပွင့်တွေ အသက် ၃၀ ရောက်တဲ့အထိ သူတို့ရဲ့ စစ်မှုထမ်းတာဝန်ကို ရပ်ဆိုင်းဖို့ ခွင့်ပြုထားပါတယ်။

နျူကလီးယားလက်နက်ပိုင်ဆိုင်တဲ့ မြောက်ကိုရီးယားကို ခုခံကာကွယ်ဖို့ ကြိုးပမ်းမှု တစိတ်တပိုင်းအနေနဲ့ အသက် ၁၈ နှစ်ကနေ ၂၈ နှစ်ကြား အမျိုးသားအားလုံး တောင်ကိုရီးယားမှာ စစ်မှုမထမ်းမနေရကိစ္စဟာ အလွန်အငြင်းပွားစရာ ဖြစ်နေပါတယ်။

အိုလံပစ်နဲ့ အာရှအားကစားပြိုင်ပွဲတွေမှာ ထိပ်တန်းဆုတွေရတဲ့ ဆုတံဆိပ်ရှင်တွေ၊ တချို့ပြိုင်ပွဲတွေမှာ ဆုရတဲ့ ဂီတနဲ့ အကပညာရှင်တွေအတွက် စစ်မှုမထမ်းမနေရ တာဝန်ကို ရပ်စဲခွင့်ပြုတာ ဒါမှမဟုတ် စစ်မှုထမ်းသက် လျှော့ဖို့ ကင်းလွတ်ခွင့်တွေ ရခဲ့ဖူးပါတယ်။

K-pop ကြယ်ပွင့်တွေအတွက် စစ်မှုထမ်းသက်တမ်း တိုစေမယ့် ဥပဒေကြမ်းကို လွှတ်တော်ထဲမှာ အချေအတင် ဆွေးနွေးနေပါပြီ။

BTS ကို ဆက်လက်ဖျော်ဖြေခွင့် ပြုခြင်းအားဖြင့် ကလေးမွေးဖွားနှုန်းနိမ့်လို့ ကျဆင်းနေတဲ့ နိုင်ငံ့ဝန်ထမ်းအရင်းအမြစ်တွေကို မထိခိုက်စေဘဲ တပ်မတော်ဟာ အမျိုးသား အကျိုးစီးပွားကို ဆောင်ရွက်နိုင်မယ်လို့ ကာကွယ်ရေးဝန်ကြီး လီဂျုံဆပ်က လွှတ်တော်အစည်းအဝေးမှာ ပြောခဲ့ပါတယ်။

BTS ရဲ့ စီမံခန့်ခွဲမှုအဖွဲ့ Big Hit ကတော့ မှတ်ချက်ပေးဖို့ တောင်းဆိုတာကို မတုံ့ပြန်ပါဘူး။

အဖွဲ့ဝင်ခုနှစ်ယောက်ပါ တေးဂီတအဖွဲ့ဟာ ပင်ပန်းနွမ်းနယ်နေလို့ တကိုယ်တော် ပရောဂျက်တွေကို လုပ်ဖို့ အုပ်စုလိုက် လှုပ်ရှားမှုတွေကနေ ခဏအနားယူမယ်လို့ ဇွန်လမှာ ကြေညာခဲ့ပြီး တောင်းပန်ပါတယ်။

လွှတ်တော်အတွင်း စကားလုပွဲမှာ မသေချာ မရေရာမှုတွေကြောင့် အဖွဲ့ဝင်တချို့ အခက်တွေ့နေရလို့ ဆုံးဖြတ်ချက်တခုချဖို့ Big Hit အရာရှိတဦးက ဧပြီလတုန်းက တောင်းဆိုခဲ့ပါတယ်။