ဝန်ကြီးချုပ် သက်တမ်း ၈ နှစ်ပြည့်သွားပြီဖြစ်တဲ့ ထိုင်းဝန်ကြီးချုပ် ဗိုလ်ချုပ်ကြီးဟောင်း ပရာယုဒ်ကျန်အိုးချားကို ရာထူးတာဝန်ကနေ ဆိုင်းငံ့ထားဖို့  ထိုင်းနိုင်ငံရဲ့ ဖွဲ့စည်းပုံအခြေခံဥပဒေတရားရုံးက ဩဂုတ် ၂၄ ရက် ဒီကနေ့ ဆုံးဖြတ်လိုက်ပါတယ်။   

ထိုင်းဝန်ကြီးချုပ် ဗိုလ်ချုပ်ကြီး ပရယုဒ်ကျန်အိုးချားဟာ မနေ့ညသန်းခေါင်အချိန်မှာ  ဝန်ကြီးချုပ် သက်တမ်း ၈ နှစ်ပြည့်သွားတာဖြစ်ပြီး လုပ်သက်ပြည့်ဝန်ကြီးချုပ်အနေနဲ့  တရားဥပဒေနဲ့အညီ ရာထူးကနုတ်ထွက်ပေးဖို့ အတိုက်အခံလွှတ်တော်အမတ်တွေရဲ့ တောင်းဆိုစာကို လွှတ်တော်ဥက္ကဋ္ဌ ချွန်းလိဖိုင်းက အခြေခံဥပဒေတရားရုံးသို့ ပြီးခဲ့တဲ့အပတ်ကတည်းက ပေးပို့ထားခဲ့ပါတယ်။ 

ဒီတောင်းဆိုချက်နဲ့ပတ်သက်လို့ အခြေခံဥပဒေတရားရုံးမှ ခုံရုံးတရားသူကြီးများအဖွဲ့က  ဒီနေ့မနက် ၁၀ နာရီကစ အစည်းအဝေး ထိုင်နေကြပြီး မွန်းလွဲ ၁ နာရီလောက်မှာတော့ ခုံရုံးတရားသူကြီးများအဖွဲ့က ထိုင်းဝန်ကြီးချုပ် ပရာယုဒ် ကျန်အိုးချားအား နောက်ထပ်အမိန့်မချမှတ်မချင်း ဝန်ကြီးချုပ်ရာထူးမှ ဆိုင်းငံ့ထားဖို့ ၅ မဲ ၄ မဲ နဲ့ ဆုံးဖြတ်လိုက်တာလို့ ဆိုပါတယ်။ 

ထိုင်းအခြေခံဥပဒေတရားရုံးမှာ ခုံသမာဓိတရားသူကြီး စုစုပေါင်း ၉ ဦးရှိပြီး  ရာထူးဆိုင်းငံ့ဖို့ ၅ ဦးက သဘောတူခဲ့တာဖြစ်ပါတယ်။ 

ဝန်ကြီးချုပ်အား ရာထူးဆက်ခန့်ရေး မခန့်ရေးကိုတော့ လာမယ့်စက်တင်ဘာ ၁ လအတွင်း ယတိပြတ် ဆွေးနွေးထုတ်ပြန်သွားမယ်လို့ ဆိုပါတယ်။ 

မနေ့ညကကျင်းပတဲ့ဆန္ဒပြပွဲတွေမှာတော့ ဗိုလ်ချုပ်ကြီး ပရယုဒ် ကျန်အိုးချားဟာ ဩဂုတ်လ ၂၃ ရက် ည သန်ခေါင်ယံမှာ ၈ နှစ်သက်တမ်းပြည့်သွားပြီဖြစ်လို့ ဆက်လက်ပြီး ရာထူး ဆက် ခံမယ်ဆိုရင်တော့ တရားမဝင် ဝန်ကြီးချုပ်ပဲဖြစ်တယ်လို့ ကြေညာခဲ့ကြပါတယ်။ 

ဖွဲ့စည်းပုံခုံရုံးရဲ့ ဆုံးဖြတ်ချက်ထွက်လာပြီးနောက် ရာထူးက ဆိုင်းငံ့ခံလိုက်ရတဲ့ ဝန်ကြီးချုပ် ပရာယုဒ်ရဲ့ နေရာမှာ လက်ထောက်ဝန်ကြီးချုပ် ပရာဝစ် ဝုန်းဆုဝမ်းက   ယာယီတာဝန်ယူမှာဖြစ်ပါတယ်။