မိုးသည်ထန်စွာ ရွာသွန်းမှုကြောင့် ကရင်နီ(ကယား)ပြည်နယ်၊ ဖားဆောင်းမြို့နယ် မော်ချီးဒေသရှိ တောင်ပေါ် ရတနာအောင်မြေရပ်ကွက်မှာ မြေပြိုမှုဖြစ်ပွားခဲ့ပြီး နေအိမ် ၆ လုံး ပြိုကျ ပျက်စီးသွားပါတယ်။

မြေပြိုမှုကြောင့် ဩဂုတ် ၂၁ ရက် မနက်ပိုင်းက နေအိမ် ၂ လုံး၊ ၂၂ ရက်က နေအိမ် ၄ လုံးနဲ့ လမ်းလည်း ပျက်စီးသွားခဲ့တာလို့ ဒေသခံလူငယ်တယောက်က ပြောပါတယ်။

“အိမ်က ၆ လုံးနဲ့ ကလေးနှစ်ယောက် ပွန်းပဲ့ဒဏ်ရာရတယ်။”

ဒါ့အပြင် မြေပြိုမှုအနီးမှာ နေထိုင်သူတွေကိုလည်း တောင်ပေါ် ၁၅ ရပ်ကွက်က မူလတန်းကျောင်းမှာ ရွှေ့ပြောင်းထားကြောင်း ဒေသခံတွေက ပြောပါတယ်။

ခဲသတ္တုတူးဖော်ရေးလုပ်ငန်း အဓိကလုပ်ဆောင်နေတဲ့ မော်ချီးဒေသမှာ နှစ်စဉ် မိုးရာသီရောက်တိုင်း မြေပြိုမှုဖြစ်ပွားလေ့ရှိပြီး ၂၀၁၅ ခုနှစ်က မြေပြိုမှုကြောင့် လူ ၂၀ ထက်မနည်း သေဆုံးခဲ့ပါတယ်။

မြေပြိုမှုအန္တရာယ်ရှိတဲ့ နေရာတွေကို အစိုးရတာဝန်ရှိသူတွေက ရွှေ့ပြောင်း နေရာချထားပေးပေမဲ့ စီးပွားရေးအဓိက အားထားတဲ့နေရာ ဖြစ်တာကြောင့် ဒေသခံအများစုဟာ နေရာရွှေ့ပြောင်းလိုခြင်းမရှိဘဲ အဲဒီနေရာမှာပဲ ဆက်လက်နေထိုင်နေကြပါတယ်။