ထိုင်းယာယီဝန်ကြီးချုပ် ပရဝစ်ဝုန်းဆုဝမ်း (Big Pom) အကြောင်း တစေ့တစောင်း

ထိုင်းအခြေခံဥပဒေတရားရုံးက ဝန်ကြီးချုပ် ပရာယုဒ် ကျန်အိုးချားကို ရာထူးမှ ယာယီရပ်စဲထားကြောင်း ဩဂုတ် ၂၄ ရက် ယမန်နေ့က ဆုံးဖြတ်ချက်ချလိုက်တဲ့နောက် ထိုင်းဥပဒေအရ ဒုဝန်ကြီးချုပ် ပရဝစ် ဝုန်းဆုဝမ်းက ယာယီ ဝန်ကြီးချုပ် ဖြစ်လာပါတယ်။
ယာယီဝန်ကြီးချုပ် ပရဝစ် ဝုန်းဆုဝမ်းဟာ ဖခင် ဗိုလ်ချုပ်ပရဆစ်ဝုန်ဆုဝမ်းနဲ့ မိခင် ဆိုင်ဆနီဝုန် ဆုဝမ်တို့ကနေ ၁၉၄၅ ခုနှစ် ဩဂုတ်လ ၁၁ ရက်နေ့မှာ မွေးဖွားပြီး ဘန်ကောက်ဇာတိဖြစ်ပါတယ်။ လက်ရှိ အသက် ၇၇ နှစ်ရှိပြီဖြစ်ပြီး အိမ်ထောင်မရှိတဲ့ လူပျိုကြီး ဖြစ်ပါတယ်။
သူဟာ စစ်တပ်အသိုင်းအဝိုင်းထဲက မွေးဖွားလာသူပီပီ ဗိုလ်သင်တန်းကျောင်းတက်ပြီး အသက် ၂၅ နှစ်အရွယ်ကတည်းက စစ်တပ်ထဲမှာ ဝင်ရောက်အမှုထမ်းခဲ့ပါတယ်။ ဝန်ကြီးချုပ်ဟောင်း ထပ်ဆင်ရှင်နာဝပ် လက်ထက်မှာရော ဒီမိုကရက်ပါတီက အဖိဆစ်ဝေ့ချာချီဝ ဝန်ကြီးချုပ်လက်ထက်မှာပါ ကာကွယ်ရေးဦးစီးချုပ် ဖြစ်ခဲ့ပါတယ်။
အာဏာသိမ်းစစ်ကောင်စီလက်ထက်မှာတော့ ဒုဝန်ကြီးချုပ်၊ ဒုကာကွယ်ရေးဝန်ကြီးအဖြစ်သာ ဝန်ယူပါတယ်။
ထိုင်းနိုင်ငံ ရွေးကောက်ပွဲပြန်လည်ကျင်းပတဲ့အခါမှာ ဖရန်းပချားရတ်ပါတီ ထူထောင်ရာမှာ သူလည်းဦးဆောင်ပါဝင်ခဲ့ပြီး နိုင်ငံရေးလောကထဲ ဝင်ရောက်လာပါတယ်။
ရွေးကောက်ပွဲမှာ ဖရန်းပချားရတ်ပါတီ အနိုင်ရတဲ့နောက် ဗိုလ်ချုပ်ကြီးပရယုဒ်က ဝန်ကြီးချုပ် ဖြစ်လာပြီး သူကတော့ ဒုဝန်ကြီးချုပ်နဲ့ ကြည်းတပ်ဦးစီးချုပ် ဖြစ်လာပါတယ်။ ရှပ်နီ ရှပ်ဝါ ဆန္ဒပြပွဲနဲ့ ပဋိပက္ခအတွင်း ရှပ်နီဘက်ကလူတွေကို နှိမ်နင်းနှိပ်ကွပ်ရာမှာ တာဝန်ရှိသူတစ်ဦးလည်း ဖြစ်ပါတယ်။
သူ့ရဲ့ ငယ်နာမည်က ပွမ့် ဖြစ်ပြီး သတင်းစာခေါင်းကြီးပိုင်းတွေမှာတော့ သူ့ကို Big Pom လို့ တင်စားသုံးနှုန်းပါတယ်။ ထိပ်တန်းပုဂ္ဂိုလ် ဆိုတဲ့သဘောပါ။ ဗိုလ်ချုပ်ကြီး ပရာယုဒ်ကိုတော့ Big Tu လို့ သုံးပါတယ်။ မနေ့က Big Tu တာဝန်ဆိုင်းငံ့ခံရတဲ့နောက် “ Big Tu သွား Big Pom လာ” ဆိုတဲ့ ဗန်းစကား လူမှုကွန်ရက်မှာ ရေပန်းစားသွားပါတယ်။
သူ့ကို လူသိများစေတဲ့ အချက်တစ်ချက်မှာ လွန်ခဲ့တဲ့ ၅ နှစ်ကျော်က ဘတ်သန်းနဲ့ချီတန်ဖိုးရှိတဲ့ အကောင်းစားနာရီ၊ လက်စွပ်တွေကို ထည်လဲဝတ်ဆင်ပြီး ပိုင်ဆိုင်မှုပြစာရင်းထဲ မထည့်ခဲ့တဲ့ကိစ္စနဲ့ ပတ်သက်လို့ ပြဿနာတက်ခဲ့တာပဲ ဖြစ်ပါတယ်။ လာဘ်စားမှုနှိမ်နင်းရေးဌာနက သူ့ကို အရေးယူဖို့ စစ်ဆေးမေးမြန်းရာမှာ အဆိုပါလက်စွပ်နဲ့နာရီတွေဟာ သူများဆီက ငှားလာတာလို့ ဖြေဆိုခဲ့ပါတယ်။ အဲဒီအမှုကနေ လွတ်မြောက်လာပေမယ့် သူဟာ အငှါးကြွားဆိုပြီး ပြောစမှတ်ဖြစ်သွားသလို ထိထိရောက်ရောက်မစုံစမ်းဘဲ အမှုက လွတ်ကင်းစေခဲ့တဲ့ လာဘ်စားမှုနှိမ်နင်းရေးဌာနလည်း ဝေဖန်ခံခဲ့ရပါတယ်။
နောက်ထပ် ထင်ရှားတဲ့ ဝိသေသတစ်ခုမှာ သတင်းထောက်တွေ မေးတာကို သိပ်ဖြေကြားလေ့မရှိဘဲ မသိဘူး မသိဘူးလို့ ပြန်ပြောတာ။ မိုးခေါင် ရေရှားပြီး အဝီစိတွင်းစီမံကိန်းကိစ္စနဲ့ ပတ်သက်လို့ မေးရာမှာလည်း မသိဘူး မသိဘူး၊ ဒါပေမဲ့ မဆိုးဘူးလို့ ပြန်ဖြေတာကြောင့် မသိဘူးဆိုတဲ့ လူကြီးအဖြစ် ပြောစမှတ်ဖြစ်နေပါတယ်။
အိမ်ထောင်မရှိ လူပျိုကြီး ဖြစ်နေရတဲ့အကြောင်းကိုလည်း သတင်းထောက်တွေ မေးတဲ့အခါတိုင်း ဒါဟာ သူ့ရဲ့ကိုယ်ရေးကိုယ်တာကိစ္စ ဖြစ်တယ်လို့သာ ဖြေကြားခဲ့ပါတယ်။
သူဟာ ယာယီဝန်ကြီးချုပ် ဆိုပေမယ့် အစိုးရဝန်ကြီးများအဖွဲ့ဝင် ရွေးချယ်ခွင့်၊ ထိုင်းအမျိုးသား လွှတ်တော်ဖျက်သိမ်းနိုင်ခွင့် အပါအဝင် ဝန်ကြီးချုပ်တယောက်ရဲ့ လုပ်ပိုင်ခွင့်အာဏာ အပြည့်အဝရှိတယ်လို့ ဝန်ကြီးချုပ်လက်ထောက် ဝိစနုခေးငမ်းက မနေ့က သတင်းထောက်တွေကို ပြောပါတယ်။
ဗိုလ်ချုပ်ကြီးပရယုဒ် ထွက်ပြီး ဗိုလ်ချုပ်ကြီး ပရဝစ် ပြန်ဝင်လာတာဟာ အင်တုံကြီးထဲမှာ လှေ လှော်သလို ခရီးမတွင် နဂိုအတိုင်းပဲလို့ အတိုက်အခံပါတီတစ်ခုဖြစ်တဲ့ Move Forward Party ခေါင်းဆောင် ထိမ်းဖိထားလိုမ့်ကျရွန်းရတ်က ပြောဆိုပြီး တိုင်းပြည်တိုးတက်ထွန်းကားဖို့ ပြည်သူတွေ နှစ်သက်တဲ့ခေါင်းဆောင် ရွေးချယ်ဖို့ ရွေးကောက် ပွဲအမြန်လုပ်ဆောင်ဖို့ ယမန်နေ့က တိုက်တွန်းလိုက်ပါတယ်။
ယာယီဝန်ကြီးချုပ်ရဲ့ လုပ်ပိုင်ခွင့်နဲ့ ဥပဒေအရ ဝန်ကြီးချုပ်ပရာယုဒ်ကျန်အိုးချားဟာ ဝန်ကြီးချုပ် ပြန်ဖြစ်လာနိုင်တဲ့အလားအလာ ရှိတာကြောင့် အတိုက်အခံပါတီနဲ့ ဆန္ဒပြအဖွဲ့တွေက ဗိုလ်ချုပ်ကြီး ပရာယုဒ်ကိုယ်တိုင် နုတ်ထွက်ကြောင်း ကြေညာဖို့ လိုလားနေပါတယ်။ အခြေခံဥပဒေတရားရုံးရဲ့ ယမန်နေ့က ဆုံးဖြတ်ချက်ကိုလေးစားထောက်ခံပေမယ့် ပရာယုဒ်ကိုယ်တိုင် နုတ်ထွက်ဖို့ ယမန်နေ့ညက ဆက်လက်ဆန္ဒပြခဲ့ကြပါတယ်။
ကိုးကား- Sanook/ThaiPBS/- Wikipedia