ချဲလ်ဆီးအသင်းဟာ လက်စတာနောက်ခံလူ ဖိုဖာနာကို ခေါ်ယူဖို့ ကလပ်နှစ်သင်းကြားမှာ သဘောတူညီမှုရရှိသွားပါတယ်။

အစောပိုင်းက ချဲလ်ဆီးရဲ့တတိယအကြိမ်မြောက်ကမ်းလှမ်းချက် ပယ်ချခံခဲ့ရပေမယ့် နောက်ဆုံးအကြိမ် ဆွေးနွေးမှုမှာအဆင်ပြေခဲ့ပြီး ပေါင်သန်း ၇၀ ကျော်နဲ့ သဘောတူညီမှုရခဲ့တယ်လို့ သိရပါတယ်။

အသက် ၂၁ နှစ် ပြင်သစ်နောက်ခံလူဟာ လက်စတာကနေထွက်ခွာချင်ကြောင်း တောင်းဆိုခဲ့ပြီးနောက် အသင်းက ယူ ၂၃ အသင်းနဲ့ အတူပူးပေါင်း လေ့ကျင့်စေခဲ့ပြီး နှစ်ပွဲဆက်တိုက်လွဲချော်ခဲ့တာပါ။

လက်ရှိအချိန်မှာတော့ ချဲလ်ဆီးအသင်းရဲ့ စတုတ္ထအကြိမ်မြောက် ကမ်းလှမ်းချက်ကို လက်စတာဘက်က လက်ခံခဲ့တာပါ။

ဖိုဖာနာအတွက် ချဲလ်ဆီးအသင်းက ပေါင်သန်း ၇၀ နဲ့ တခြားဆုကြေးတွေပါဝင်ပြီး ၆ နှစ်စာချုပ်ချုပ်ဆိုသွားမယ်လို့ သိရပါတယ်။

သူဟာ ၂၀၂၀ ပြည့်နှစ်ကမှ ပြင်သစ်ကလပ် စိန့်အက်တီယန်ကနေ ပြောင်းရွှေ့လာခဲ့ပြီး လက်စတာအတွက် ၅၂ ပွဲကစားခဲ့ကာ ၁ ဂိုးသွင်းခဲ့ပါတယ်။