နယ်သာလန်နိုင်ငံအရှေ့မြောက်ပိုင်း ဂရိုနီအန်ပြည်နယ်ရှိ တဲယ်အာပဲလ်ခိုလှုံရေးစင်တာမှာ ဒုက္ခသည်တွေအပေါ် လူမဆန်တဲ့ အခြေအနေတွေကို ကိုင်တွယ်ဖြေရှင်းပေးဖို့ ဒတ်ချ်အစိုးရအပေါ် ဖိအားတွေ တိုးလာပါတယ်။

ဒီမှာ ခိုလှုံခွင့်တောင်းသူတွေဟာ စိတ်ပျက်စရာအခြေအနေနဲ့ ကနဦးနေထိုင်နေကြရတယ်လို့ ကယ်ဆယ်ရေးစခန်းရှိ နယ်စည်းမခြားဆရာဝန်များအဖွဲ့ (MSF)  အရေးပေါ် ညှိနှိုင်းရေးမှူး မိုနစ်နာဂဲလ်ခါကီက ပြောပါတယ်။

လတ်တလောသီတင်းပတ်တွေမှာ တဲယ်အာပဲလ်ရှိ ကြိုဆိုလက်ခံရေးစင်တာရဲ့ အပြင်ဘက်မှာ ဖြစ်သလို အိပ်စက်နေရတဲ့ ခိုလှုံခွင့်တောင်းခံထားသူ အယောက်   ၇၀၀ ကျော်ကို ရည်ညွှန်းပြောဆိုခဲ့တာပါ။

ဂေဟာအပြင်ဘက်မှာ အပူလှိုင်းနဲ့ မိုးကြိုးမုန်တိုင်းတွေအကြား ၁၁ ရက်ကြာ အိပ်စက်ခဲ့ရပြီး ဂေဟာအစောင့်ကို သွားပြောပြတိုင်းလည်း စောင့်နေရမယ်လို့ပဲ ပြန်ပြောပြီး ဖြေရှင်းမပေးဘူးလို့ အသက် ၂၅ နှစ်အရွယ် မိုဟာမက်က ပြောပြပါတယ်။ 

တဲယ်အာပဲလ်စင်တာရှိ အခြေအနေတွေဟာ လူမဆန်ပဲ ဥရောပသမဂ္ဂ ဥပဒေကို ချိုးဖောက်နေကြောင်း ဒတ်ခ်ျဒုက္ခသည်များကောင်စီက ပြောကြားခဲ့ပါတယ်။

နယ်သာလန်ရုပ်သံလိုင်း RTL သတင်းဌာနရဲ့ သတင်းပေးပို့ချက်မှာတော့ အစိုးရဟာ စင်တာရဲ့စွမ်းဆောင်ရည်ကို မြှင့်တင်ပြီး အခြေအနေတွေကို ပြုပြင်ဖို့နဲ့ ဒုက္ခသည်တွေ ထပ်ခေါ်ဖို့ ဒေသဆိုင်ရာ အာဏာပိုင်တွေကို အမိန့်ပေးခဲ့ကြောင်း ပေါက်ကြားလာတဲ့ အစီအစဉ်ကို ကိုးကားပြီး ထုတ်ပြန်သွားပါတယ်။ 

ဒုက္ခသည်များကောင်စီက တရားစွဲဆိုမှုကို  စက်တင်ဘာ ၁၅ ရက်မှာ ကြားနာဖို့ စီစဉ်ထားပြီး အောက်တိုဘာ ၁ ရက်ကစလို့ သန့်ရှင်းတဲ့ရေ ရရှိဖို့၊ ရေချိုးခန်း၊ ကိုယ်ရေးကိုယ်တာပိုင်း၊ လုံလောက်တဲ့ အစားအစာနဲ့ကျန်းမာရေးစောင့်ရှောက်မှုတွေ အပါအဝင် ပိုကောင်းမွန်တဲ့ အခြေအနေတွေကို တောင်းဆိုထားပါတယ်။