လက်စတာအသင်းလူစာရင်းဟာ အပြောင်းအရွှေ့ကိစ္စတွေကြောင့် မတည်မငြိမ် ဖြစ်နေရကြောင်း နည်းပြ ဘရန်ဒန်ရော်ဂျာက ပြောပါတယ်။

လက်စတာအသင်းဟာ ပရီးမီးယားလိဂ် အဖွင့်လေးပွဲမှာ သုံးပွဲရှုံး၊ တပွဲသရေရလဒ်နဲ့ အမှတ်ပေးဇယားအောက်ဆုံးမှာ ရပ်တည်နေတာပါ။ အဲဒီလို ရလဒ်ကောင်းမွန်ခြင်း မရှိတာဟာ အသင်းရဲ့လူစာရင်း တည်ငြိမ်မှုမရှိတာတွေနဲ့ သက်ဆိုင်ကြောင်း နည်းပြရော်ဂျာက ထောက်ပြသွားခဲ့တာပါ။

“ကျနော် အရင်က ပြောခဲ့သလိုပါပဲ။ ခြေစွမ်းတိုးတက်လာနိုင်မယ့် ပတ်ဝန်းကျင်တိုင်းက တည်ငြိမ်မှုရှိဖို့လိုတယ်။ ကျနော်တို့ တည်ငြိမ်မှုမရှိသေးပါဘူး။ အပြောင်းအရွှေ့ ပိတ်သိမ်းသွားချိန်မှာတော့ ပြောင်းလဲသွားနိုင်တယ်” လို့ နည်းပြရော်ဂျာက ပြောပါတယ်။

လက်စတာအသင်းဟာ ကစားသမားခေါ်ယူမှုအနေနဲ့ အရန်ဂိုးသမားတဦးပဲ ခေါ်ယူထားပြီး အဓိက ကစားသမားတွေက ထွက်ခွာတာရှိသလို ဆက်လက်ထွက်ခွာဖို့လည်း ရှိပါတယ်။

ဂိုးသမားရှမိုက်ကယ်က အသင်းနဲ့ လမ်းခွဲခဲ့သလို နောက်ခံလူ ဖိုဖာနာကလည်း ချဲလ်ဆီးဆီပြောင်းဖို့ သဘောတူညီခဲ့ပါတယ်။

အလားတူ စာချုပ်သက်တမ်း နောက်ဆုံးနှစ်ထဲရောက်နေတဲ့ တိုင်လေမန်းစ်၊ မက်ဒီဆန်၊ ဟာဗေးဘန်းစ်တို့ဟာလည်း အပြောင်းအရွှေ့သတင်း ထွက်ပေါ်နေပါတယ်။