ကုလသမဂ္ဂ နျူကလီးယားစောင့်ကြည့်ရေးအဖွဲ့က ယူကရိန်းတောင်ပိုင်းက ရုရှားထိန်းချုပ်တဲ့ ဇာပိုရစ်ချ်ဇီယာ နျူကလီးယား ဓာတ်အားပေးစက်ရုံဆီ ဦးတည်သွားနေချိန်မှာ သြဂုတ် ၂၉ ရက်က ရိုက်ကူးခဲ့တဲ့ ဂြိုဟ်တုဓာတ်ပုံတွေထဲမှာ နျူကလီးယား ဓာတ်ပေါင်းဖိုနဲ့ ကပ်နေတဲ့ အဆောက်အဦရဲ့ ခေါင်မိုးမှာ အပေါက်အများအပြားကို တွေ့ရပါတယ်။

အမေရိကန်ပုဂ္ဂလိကကုမ္ပဏီ မက်ဇာတက္ကနိုလိုဂျီက ထုတ်ဝေလိုက်တဲ့ ပုံတွေထဲမှာ စက်ရုံရဲ့ နယ်နိမိတ် အပြင်ဘက်မှာ ခြုံမြေတွေ မီးလောင်ထားတာကို ပြနေပါတယ်။

စက်ရုံတဝိုက် တိုက်ပွဲတွေကြောင့် စက်ရုံရဲ့ အရှေ့မြောက်ဘက် ၃၅ မိုင်အကွာ ယူကရိန်း ထိန်းချုပ်ရာမြို့က အာဏာပိုင်တွေက ဒေသခံတွေကို အိုင်အိုဒင်းဆေးပြားတွေ ထုတ်ပေးခဲ့ပါတယ်။

ဓာတ်ရောင်ခြည်ယိုစိမ့်ရင် အိုင်အိုဒင်းဆေးပြားကို ဘယ်လိုသုံးရမယ်ဆိုတာကို သင်ကြားပို့ချပေးပါတယ်။

ယူကရိန်းနဲ့ ရုရှား အစိုးရ နှစ်ရပ်စလုံးက ဥရောပရဲ့ အကြီးဆုံး နျူကလီးယား ဓာတ်အားပေးစက်ရုံဖြစ်တဲ့ အဲဒီစက်ရုံကို သူတို့ ပစ်မှတ်မထားဘူးလို့ ငြင်းရင်း အချင်းချင်း အပြန်အလှန် စွပ်စွဲထားကြပါတယ်။

စက်ရုံတွင်း လောင်စာဆီ သိုလှောင်ရုံရဲ့ ခေါင်မိုးက အပေါက်တခုဟာ ယူကရိန်းက ဒုံးကျည်နဲ့ ပစ်လွှတ်လိုက်လို့ ဖြစ်တာလို့ ရုရှားတာဝန်ရှိသူတွေက တနင်္လာနေ့မှာ ပြောခဲ့တယ်လို့ ရုရှားအခြေစိုက် ရီယာ နိုဗိုစတီ သတင်းဌာနက ဖော်ပြခဲ့ပါတယ်။

ဓာတ်ပေါင်းဖို အဆောက်အအုံကို တိုက်ခိုက်ဖို့ ကြိုးပမ်းနေတဲ့ ယူကရိန်း မောင်းသူမဲ့ လေယာဉ်ကို ရုရှားတပ်ဖွဲ့ဝင်တွေက ပစ်ချခဲ့တယ်လို့ ရုရှားကာကွယ်ရေးဝန်ကြီးဌာနက ပြောပါတယ်။ အစီရင်ခံစာနှစ်ခုစလုံးကို သီးခြား အတည်မပြုနိုင်ပါဘူး။

နိုင်ငံတကာ အဏုမြူစွမ်းအင်အေဂျင်စီ (IAEA) က လုပ်ငန်းအဖွဲ့တဖွဲ့ဟာ ဩစတြီးယားနိုင်ငံ မြို့တော် ဗီယင်နာကနေ ထွက်ခွာခဲ့ပြီး တနင်္လာနေ့နှောင်းပိုင်းမှာ ယူကရိန်းမြို့တော် ကိယက်ဗ်ကို ရောက်လာမယ်လို့ ယူကရိန်း နိုင်ငံခြားရေးဝန်ကြီးဌာနက ပြောထားပါတယ်။