တရုတ်နိုင်ငံဟာ ဒီမိုကရက်တစ် ထိုင်ဝမ်ကျွန်းအနီး စစ်ရေးလှုပ်ရှားမှုတွေ တိုးလုပ်လာတာကြောင့် တကယ်လို့များ တရုတ်စစ်တပ်တွေက သူ့ပိုင်နက်နယ်မြေထဲ ဝင်လာခဲ့ရင် ထိုင်ဝမ်က ကိုယ်ပိုင်ခုခံကာကွယ်မှုနဲ့ တန်ပြန်တိုက်ခိုက်ပိုင်ခွင့်ကို ကျင့်သုံးမှာဖြစ်ကြောင်း သြဂုတ် ၃၁ ရက်မှာ ပြောကြားခဲ့ပါတယ်။

အမေရိကန် အောက်လွှတ်တော်ဥက္ကဋ္ဌ နန်စီ‌ေပလိုစီရဲ့ တိုင်ပေခရီးစဉ်ကို တုံ့ပြန်တဲ့အနေနဲ့ ဘေကျင်းဟာ အခုလအတွင်း ကျွန်းတဝိုက်မှာ စစ်ရေးလေ့ကျင့်မှုတွေ ပြုလုပ်ခဲ့တာပါ။

တရုတ်ရဲ့ ရန်စတာတွေအပေါ် ပြင်းထန်တဲ့ တန်ပြန်အရေးယူမှုတွေ ပြုလုပ်ဖို့ သမ္မတ ဆိုင်အင်းဝမ်က ထိုင်ဝမ်စစ်တပ်ကို အမိန့်ပေးပြီးနောက် သြဂုတ် ၃၀ ရက်က ထိုင်ဝမ်ဟာ ကျွန်းကိုလာနှောင့်ယှက်တဲ့ တရုတ်ဒရုန်းတစီးကို ပထမဆုံးအကြိမ် သတိပေး ပစ်ခတ်ခဲ့ပါတယ်။

ထိုင်ဝမ်ဟာ တရုတ်ရဲ့ ကမ်းရိုးတန်းအနီးရှိ သူ့ရဲ့ကျွန်းစုငယ်တွေအနီးမှာ တရုတ်ဒရုန်းတွေ အကြိမ်ကြိမ် လာရောက်ပျံသန်းနေတာကို မကျေမနပ် ဖြစ်နေတာပါ။

ခြိမ်းခြောက်မှုတွေ ပြုလုပ်ပြီးနောက်မှာ သူ့ပိုင်နက်ထဲကနေ ထွက်သွားဖို့ သတိပေးချက်တွေကို ဂရုမစိုက်ခဲ့တဲ့ တရုတ်ဒရုန်းတွေကို တန်ပြန်တိုက်ခိုက်ဖို့ ထိုင်ဝမ်စစ်တပ်က တူညီတဲ့ အခွင့်အရေးကို ကျင့်သုံးမှာဖြစ်ကြောင်း စစ်ဆင်ရေးနဲ့ စီမံကိန်းဆိုင်ရာ အထွေထွေဝန်ထမ်းဦးစီးဌာနရဲ့ လက်ထောက်အကြီးအကဲ Lin Wen-Huang က ဗုဒ္ဓဟူးနေ့ သတင်းစာရှင်းလင်းပွဲမှာ သတင်းထောက်တွေကို ပြောကြားခဲ့ပါတယ်။

ထိုင်ဝမ်ရေလက်ကြားတလျှောက် နိုင်ငံခြားရေတပ်သင်္ဘောတွေ တရုတ်ရဲ့ခွင့်ပြုချက်မရှိဘဲ မဖြတ်သန်းရ ဆိုတာကို ငြင်းပယ်ဖို့ ထပ်လုပ်ဆောင်သွားဦးမှာဖြစ်တယ်လို့ စစ်အကယ်ဒမီ အမျိုးသားကာကွယ်ရေးတက္ကသိုလ် ဒါရိုက်တာ Ma Cheng-Kun က ဒီသတင်းစာရှင်းလင်းပွဲမှာပဲ ပြောကြားသွားခဲ့ပါတယ်။