ယူကရိန်းနိုင်ငံတောင်ပိုင်း ဇာပိုရစ်ချ်ဇီယာမြို့က အာဏာပိုင်တွေဟာ ဒေသတွင်း နျူကလီးယား ဓာတ်အားပေးစက်ရုံမှာ ဓာတ်ရောင်ခြည် ကျရောက်တာနဲ့ ပတ်သက်ပြီး လေ့ကျင့်ပြသတဲ့ ဗီဒီယိုကို သြဂုတ် ၃၁ ရက်မှာ ထုတ်ပြန်ခဲ့ပါတယ်။

ဗွီဒီယိုဖိုင်ထဲမှာ အကာအကွယ်ဝတ်စုံတွေနဲ့ အသက်ရှူနှာခေါင်းစည်းတွေ ဝတ်ထားတဲ့ အလုပ်သမားတွေဟာ လေ့ကျင့်ခန်းတွေ လုပ်နေကြပြီး ကားတွေကို ရေနဲ့ပက်ဖျန်းနေသလို လူတွေကိုဓာတ်ရောင်ခြည်ထောက်လှမ်းတဲ့ ကိရိယာတွေသုံးရင်း စမ်းသပ်နေကြတာ တွေ့ရပါတယ်။

ယူကရိန်းနဲ့ ရုရှားတို့က အမြောက်တွေ၊ မောင်းသူမဲ့ လေယာဉ်တွေနဲ့ ပစ်ခတ်နေတယ်လို့ အပြန်အလှန် စွပ်စွဲနေလို့ ချာနိုဘိုင်း နျူကလီးယားကပ်ဘေးလို အလားတူ ဓာတ်ရောင်ခြည် ဘေးအန္တရာယ် ဖြစ်လာမှာကို စိုးရိမ်မှု ကြီးထွားနေပါတယ်။

ဥရောပရဲ့ အကြီးဆုံး နျူကလီးယားစက်ရုံ ဇာပိုရစ်ချ်ဇီယာကို ရုရှားက မတ်လအစောပိုင်းမှာ သိမ်းပိုက်ခဲ့ပြီး စစ်တပ်တွေချထားခဲ့တာပါ။

ကြာသပတေးနေ့မှာ စစ်ဆေးရေးလုပ်ဖို့ မျှော်လင့်နေတဲ့ ကုလသမဂ္ဂ စစ်ဆေးရေးမှူးတွေ ဗုဒ္ဓဟူးနေ့မှာ ယူကရိန်းကို ရောက်လာခဲ့ကြပါတယ်။

ရုရှားက ခန့်အပ်ထားတဲ့ တာဝန်ရှိသူတွေက ခရီးစဉ်တရက်သာ အချိန်ယူဖို့ အကြံပြုထားပေမဲ့ နိုင်ငံတကာ အဏုမြူစွမ်းအင်အေဂျင်စီက ရက်ကြာကြာ အချိန်ယူ စစ်ဆေးနိုင်ဖို့ မျှော်လင့်ထားပါတယ်။