ဇာပိုရစ်ချ်ဇီယာ နျူဓာတ်အားပေးစက်ရုံကို စစ်ဆေးခွင့်ပြုရန် အမေရိကန် တိုက်တွန်း
ယူကရိန်းနိုင်ငံတောင်ပိုင်း ဇာပိုရစ်ချ်ဇီယာမြို့မှာရှိတဲ့ နျူကလီးယား ဓာတ်အားပေးစက်ရုံကို နိုင်ငံတကာ အဏုမြူစွမ်းအင်အေဂျင်စီ (IAEA) ရဲ့ အဖွဲ့တဖွဲ့က စစ်ဆေးတာ ခွင့်ပြုဖို့ အမေရိကန်နိုင်ငံ ပင်တဂွန်စစ်ဌာနချုပ် သတင်းထုတ်ပြန်ရေး အတွင်းရေးမှူးသစ် ပတ်ရိုက်ဒါက ရုရှားအစိုးရကို သြဂုတ် ၃၁ ရက်မှာ တိုက်တွန်းပါတယ်။
သူ့ရဲ့ ပထမဆုံး ရုပ်သံ သတင်းစာရှင်းလင်းပွဲမှာ ရိုက်ဒါက အမေရိကန် ကာကွယ်ရေး ဝန်ကြီးဌာဟာ ဒေသတွင်း ကြိုကြားကြိုကြား ပစ်ခတ်နေတဲ့ ကျည်ဆန်တွေကို သတိပြုမိတယ်လို့ ပြောပြီး ဓာတ်အားပေးစက်ရုံ ဘေးကင်းစေဖို့ ရုရှားနဲ့ ယူကရိန်းတို့ကို တိုက်တွန်းခဲ့ပါတယ်။
ဥရောပရဲ့ အကြီးဆုံး နျူကလီးယားစက်ရုံကို ရုရှားက မတ်လအစောပိုင်းမှာ သိမ်းပိုက်ခဲ့ပြီး ရုရှားရဲ့ စစ်အင်အားက စက်ရုံထဲမှာ ရှိနေပြီးသားပါ။
ယူကရိန်းရဲ့ လျှပ်စစ်ဓာတ်အား ၂၀ ရာခိုင်နှုန်းကို ပံ့ပိုးပေးနေတဲ့ စက်ရုံကို ဆက်လည်ပတ်ဖို့ ကြိုးစားနေတဲ့ ယူကရိန်းလုပ်သား အများစုလည်း စက်ရုံထဲမှာ ရှိနေပါတယ်။
ယူကရိန်းရဲ့ တောင်ပိုင်းနယ်မြေကို ပြန်သိမ်းပိုက်ဖို့ ယူကရိန်းရဲ့ တန်ပြန်ထိုးစစ်အတွင်း ဓာတ်အားပေးစက်ရုံ အနီးဝန်းကျင်နဲ့ ခပ်လှမ်းလှမ်း အဝေးနေရာတွေမှာ ဗုဒ္ဓဟူးနေ့က တိုက်ပွဲဖြစ်ခဲ့ပါတယ်။
ယူကရိန်းနဲ့ ရုရှား အစိုးရနှစ်ဖက်စလုံးက စစ်မြေပြင်မှာ သူတို့နိုင်တယ်လို့ အခိုင်အမာ ပြောခဲ့ကြပါတယ်။
