ကချင်ပြည်နယ်၊ ဖားကန့်မြို့လယ်က ဗျူဟာကုန်းပေါ်ကို စက်တင်ဘာ ၇ ရက် ညနေ ၄ နာရီလောက်က စစ်ကောင်စီရဟတ်ယာဉ်တစီး လာရောက်ပြီး လက်နက်တွေ လာချသွားတယ်လို့ ဒေသခံတ‌ယောက်က ပြောပါတယ်။

“ဗျူဟာကုန်းမှာ စစ်ရဟတ်ယာဉ်တစီး လာပြီး လက်နက်တွေ လာချသွားတယ်။ ၅ မိနစ်လောက်ပဲ ကြာတယ်။ အဲ့လိုပဲ လက်နက်လာချပြီးရင်တော့ လက်နက်ကြီးပစ်သံတွေ မကြာခဏ ကြားနေရတယ်။ သူတို့က KIA တွေ PDF တွေနဲ့ တိုက်ပွဲဖြစ်တဲ့ နေရာတွေဘက်ကို ဒီမြို့လယ် ဗျူဟာကုန်းကနေ ပစ်တာ။ အဲ့လို ရဟတ်ယာဉ်နဲ့လာပြီး လက်နက်လာချရင် ဖားကန့်ဒေသခံတွေက လန့်နေကြရတာပဲ။”

ကချင်ပြည်နယ်၊ ဖားကန့်မြို့က ဗျူဟာကုန်းပေါ်ကို လတိုင်းလိုလို စစ်ကောင်စီတပ်က ရဟတ်ယာဉ်တွေနဲ့ လာရောက်ပြီး လက်နက်လာချသွားလေ့ရှိတယ်လို့ ဆိုပါတယ်။

ဖားကန့်မြို့နယ်မှာ စစ်ကောင်စီတပ်နဲ့ ကချင်လွတ်မြောက်ရေးတပ်မတော် (KIA)၊ PDF တို့ကြား မကြာခဏ ထိတွေ့တိုက်ပွဲ ဖြစ်ပွားလေ့ရှိတာပါ။

စက်တင်ဘာ ၇ ရက် မနက် ၈ နာရီလောက်ကလည်း ဖားကန့်မြို့နယ် နောင်းမီကျေးရွာနဲ့ ဝါရာဇွပ်ကျေးရွာကြား ခြေလျင်စစ်ကြောင်းထိုးလာတဲ့ စစ်ကောင်စီတပ်တွေကို KIA က မိုင်းဆွဲတိုက်ခိုက်ခဲ့တယ်လို့ သိရပါတယ်။