နေတိုး စစ်မဟာမိတ်အဖွဲ့နဲ့ ရုရှားတို့ကြား စစ်ရေးအရ ထိပ်တိုက်တွေ့ခဲ့ပါက ကမ္ဘာ့လုံးဆိုင်ရာ ကပ်ဘေးကြီးကို ဦးတည်သွားနိုင်တယ်လို့ ရုရှားသမ္မတ ဘလာဒီမာပူတင်က အောက်တိုဘာ ၁၄ ရက်မှာ ပြောပါတယ်။ 

“ဒီအခြေအနေမျိုး ဖြစ်မယ်လို့ ပြောဆိုနေကြတဲ့ သူတွေမှာ ဒီလို ခြေလှမ်းမျိုးတွေ မလှမ်းသင့်ဘူးဆိုတဲ့ ပါးနပ်လိမ္မာမှုမျိုးရှိမယ် မျှော်လင့်တယ်”လို့ ပူတင်က ကာဇက်စတန်နိုင်ငံ  မြို့တော် အက်စ်တာနာမှာပြုလုပ်တဲ့ သတင်းစာရှင်းလင်းပွဲမှာ ပြောပါတယ်။ 

ရုရှား ကာကွယ်ရေးဝန်ကြီးဌာနက တပ်သားသစ် စုဆောင်းနေတာ မျှော်မှန်းထားတဲ့ သုံးသိန်းက ပြည့်တော့မှာဖြစ်ပြီး နှစ်လအတွင်းမှာ လုပ်ငန်းစဉ် ပြီးဆုံးလိမ့်မယ်လို့ ဆိုပါတယ်။

ယူကရိန်းကို ဖျက်ဆီးဖို့အထိ အကြံအစည်မရှိတဲ့အတွက် နောက်ထပ် တိုက်ခိုက်တော့မှာ မဟုတ်ဘူးလို့လည်း ဆိုပါတယ်။ 

အရင်တပတ်ကပဲ ရုရှားက ကီးယက်ဗ်နဲ့ တခြားမြို့တွေကို ဒုံးကျည်တွေနဲ့ တိုက်ခိုက်ခဲ့ပြီး ပူတင်က အခုလို ပြောတာပါ။  

အဲဒီ တိုက်ခိုက်မှုဟာ ခရိုင်းမီးယားဒေသထဲက ရုရှားတံတားတစင်းကို ယူကရိန်းက တိုက်ခိုက် ဖျက်ဆီးလိုက်တာကြောင့် လက်တုံ့ပြန်တာလို့ ဆိုပါတယ်။ 

ယူကရိန်းနဲ့ ဆွေးနွေးဖို့ အစီအစဉ် ရှိ၊ မရှိ သတင်းထောက်တွေက မေးတဲ့အခါမှာတော့ ပူတင်က ယူကရိန်းဘက်က ဆွေးနွေးချင်ရင်တော့ နိုင်ငံတကာ ကြားဝင်ညှိနှိုင်းမှု လိုအပ်လိမ့်မယ်လို့ ပြောသွားပါတယ်။ 

အခု ဖြစ်ပျက်နေတာတွေအတွက် နောင်တရမိသလားလို့ သတင်းထောက်တွေက မေးတဲ့အခါမှာ တော့ ပူတင်က “ဒီနေ့ ဖြစ်ပျက်နေတာတွေက စိတ်မချမ်းမြေ့စရာတွေပါ။ ဒီလိုမှ မလုပ်ရင်လည်း ရုရှားအတွက် ပိုပြီး ဆိုးရွားတဲ့ အခြေအနေတွေ ကြုံရမှာဖြစ်လို့ ရုရှားဘက်က အချိန်ကိုက်၊ မှန်မှန်ကန်ကန် လုပ်ဆောင်လိုက်တာ” လို့ ပြောပါတယ်။ 

သတင်းစာရှင်းလင်းပွဲမှာ သတင်းထောက်တွေက အမေရိကန် သမ္မတနဲ့ စကားပြောဖို့ အစီအစဉ် ရှိသလားဆိုတဲ့ မေးခွန်းကိုတော့ ပူတင်က မလိုအပ်ပါဘူးလို့ ပြန်ဖြေသွားပါတယ်။