တောင်ကိုရီးယားနိုင်ငံ၊ ဆိုးလ်မြို့တော်မှာ အောက်တိုဘာ ၂၉ ရက် ဟောလိုးဝင်းပွဲညက လူတွေတိုးကြိတ် နင်းမိပိမိခဲ့လို့ အနည်းဆုံး ၁၄၆ ယောက် သေဆုံးပြီး ၁၅၀ လောက် ဒဏ်ရာရတယ်လို့ လတ်တလောအတည်ပြုထားပြီး ထပ်တိုးလာနိုင်တယ်လို့  ကိုရီးယားအခြေစိုက် ယွန်ဟပ်သတင်းမှာ ဖော်ပြပါတယ်။

မနေ့ညနှောင်းပိုင်းက ဆိုးလ်မြို့တော်ရှိလူစည်ကားရာ   Itaewon  မြို့နယ်မှာကျင်းပတဲ့ ဟောလိုးဝင်းပွဲကိုလာရောက်တဲ့ လူအုပ်ကြီး အချင်းချင်းတိုးမိ နင်းမိပြီး လူတွေ ရာနဲ့ချီ ထိခိုက်သေဆုံးခဲ့တာလို့ မီးသတ်အရာရှိတွေရဲ့ ပြောဆိုချက်ကို ကိုးကားပြီး သတင်းမှာ ဖော်ပြပါတယ်။ 

ညဘက်မှာ လူတွေအသွားများတဲ့ အထင်ကရနေရာတခုဖြစ်တဲ့   Hamilton ဟိုတယ်အနီး တောင်ဆင်းလမ်းကျဉ်းလေးတနေရာမှာ ဟောလိုးဝင်းပွဲလာတဲ့ ထောင်ပေါင်းများစွာသောလူတွေ ပိတ်မိပြီး အသက်ရှုကျပ် နှလုံးရပ်ပြီး  အခုလို သေဆုံးခဲ့တာလို့ မျက်မြင်တွေ့သူတွေကလည်း ပြောပါတယ်။

လူအုပ်ကြီးရဲ့ အရှေ့ပိုင်းကလူတွေ လဲကျခဲ့လို့ အနောက်ဘက်လူတွေကို တိုးမိနင်းမိပိမိခဲ့တာလို့  မျက်မြင်တွေ့သူ တယောက်က ပြောပါတယ်။ 

သေဆုံးဒဏ်ရာသူ အများစုဟာလူငယ်တွေဖြစ်ပြီး သတိမေ့သူတွေနဲ့ အသက်ရှုရခက်နေတဲ့ လူနာ အများအပြားရှိနေတဲ့အကြောင်းနဲ့ အခင်းဖြစ်ရာနေရာကို ကယ်ဆယ်ရေးအဖွဲ့တွေစေလွှတ်ပြီး ဒါဇင်နဲ့ချီတဲ့လူနာတွေကို  လမ်းဘေးမှာပဲ အရေးပေါ်ကယ်ဆယ်ရေးလုပ်ပေးနေရပါတယ်။

အခင်းဖြစ်ပြီးမကြာခင်မှာပဲ သမ္မတ   ယွန်းဆွတ်ခ်ယိုး ယွန်းဆပ်ယိုးက  အရေးပေါ် အစည်းအဝေးခေါ်ယူပြီး အရေးပေါ်ကူညီကယ်ဆယ်ရေးတွေလုပ်ကာ ဒဏ်ရာရသူတွေကို ကုသပေးဖို့ ညွှန်ကြားခဲ့တယ်လို့ သမ္မတရုံးက ပြောပါတယ်။

အခင်းဖြစ်ရာနေရာကို အရေးပေါ် ကျန်းမာရေးအရာရှိတွေနဲ့ အရေးပေါ် လူနာခုတင်တွေ လုံလုံလောက်လောက်ချထားပေးဖို့နဲ့ ဒီဖြစ်ရပ်အပေါ်မှာ သေသေချာချာ စုံစမ်းစစ်ဆေးမှုတွေလုပ်ဖို့လည်း  သမ္မတက ညွှန်ကြားခဲ့ပါတယ်။

ဥရောပကိုခရီးထွက်နေတဲ့ ဆိုးလ်မြို့တော်ဝန် အိုဆီဟွန်းဟာလည်း ဒီဖြစ်ရပ်ကြောင့် ချက်ချင်းပြန်လာဖို့ ဆုံးဖြတ်ခဲ့တယ်လို့ မြို့တော်တာဝန်ရှိသူတွေက ပြောပါတယ်။ 

အခင်းဖြစ်ရာနေရာကို လတ်တလော မီးသတ်သမား ၃၄၆ ယောက် အပါအဝင် လူပေါင်း ၈၄၈ ယောက်ကို စေလွှတ်နေရာချထားပြီး ရဲတပ်ဖွဲ့ကလည်း အနီးနားက ကလပ်တွေနဲ့ ဘားတွေ ဘေးကင်းလုံခြုံရေး စည်းမျဉ်းစည်းကမ်းတွေလိုက်နာမှုရှိ မရှိ စုံစမ်းစစ်ဆေးမှုတွေစတင်ဖို့ စီစဉ်နေပါတယ်။

Ref-Yonhap