နယူးကာဆယ်အသင်းဟာ မနေ့ညက ကစားခဲ့တဲ့ အက်စတွန်ဗီလာနဲ့ပွဲစဉ်မှာ ကစားသမား ၆ ယောက်အထိ လူစားလဲခွင့်ရခဲ့ပါတယ်။

နယူးကာဆယ်အသင်းက ဗီလာအသင်းကို ၄ ဂိုး ဂိုးမရှိနဲ့အနိုင်ရခဲ့တဲ့ အဲဒီပွဲစဉ်မှာ ပွဲချိန် ၇၁ မိနစ်မှာ ၂ ယောက် ၊ ပွဲချိန် ၈၃ မိနစ်နဲ့ ၈၆ မိနစ်တွေမှာလည်း ၂‌ ယောက်စီ လူစားလဲခဲ့တာကြောင့် ကစားသမားစုစုပေါင်း ၆ ယောက်အထိလူစားလဲအသုံးပြုခဲ့တာပါ။

ပရီးမီးယားလိဂ်စည်းမျဉ်းသစ်အရ ကစားသမား ၅ ယောက်သာ လူစားလဲခွင့်ရှိပေမယ့် တစ်ဦးပိုပြီး လူစားလဲခွင့်ရတာက ပထမပိုင်းတုန်းက ဗီလာ ဂိုးသမားမာတီနက်ဇ်က ဦးခေါင်းဒဏ်ရာကြောင့် လူစားလဲခဲ့ရလို့ဖြစ်ပါတယ်။

အခုနှစ်ရာသီ စတင်ကျင့်သုံးလိုက်တဲ့စည်းမျဉ်းသစ်အရ အသင်းတစ်သင်းရှိ ကစားသမားတယောက်ဟာ ဦးခေါင်းဒဏ်ရာကြောင့် လူစားလဲခဲ့ရမယ်ဆိုရင် လူစားလဲမှု တယောက်ပိုပြီးလဲလှယ်ခွင့်ရှိပါတယ်။

နယူးကာဆယ်အသင်းဟာ အဲဒီစည်းမျဉ်းသစ်ကိုအသုံးချပြီး ကစားသမား ၆ ယောက်အထိ လဲလှယ်ခဲ့တာဖြစ်ကာ ပထမဆုံးအသုံးပြုတဲ့အသင်းအဖြစ်လည်း မှတ်တမ်းဝင်ခဲ့ပါတယ်။

အင်္ဂလန်အက်ဖ်အေဟာ အဲဒီစည်းမျဉ်းကို အခုနှစ်ရာသီအတွက်ပဲ အသုံးပြုခွင့်ပေးထားတာဖြစ်ပေမဲ့ လာမယ့်ရာသီတွေအထိ ဆက်လက်သက်တမ်းတိုးခွင့်ပြုဖို့ရှိပါတယ်။