အမေရိကန်ပြည်ထောင်စု အီလီနွိုက်စ်ပြည်နယ် ချီကာဂိုမြို့ကြီးရဲ့ အနောက်ပိုင်းမှာ အောက်တိုဘာ ၃၁ ရက် ဟောလိုးဝင်းပွဲတော်ညက ကားမောင်းရင်း သေနတ်နဲ့ပစ်ခတ်မှု ြဖစ်ခဲ့ပြီး ကလေး ၂ ယောက်နဲ့ ဆယ်ကျော်သက်တယောက် အပါအဝင် အနည်းဆုံး လူ ၁၄ ယောက်ကို ထိမှန်ခဲ့ပါတယ်။

ဒါပေမဲ့ အသေအပျောက်သတင်းတွေ ချက်ချင်းမရသေးဘူးလို့ ရဲတပ်ဖွဲ့က ပြောပါတယ်။

ထိခိုက်ဒဏ်ရာရသူတွေဟာ အခြေအနေအမျိုးမျိုးမှာ ရှိနေကြပြီး တချို့ဟာ အသက်အန္တရာယ် စိုးရိမ်ရတဲ့ အခြေအနေမှာ ရှိနေကြောင်း ချီကာဂိုရဲမှူး ဒေးဗစ်ဘရောင်းက သတင်းစာ ရှင်းလင်းပွဲမှာ ပြောကြားခဲ့ပါတယ်။

ပစ်ခတ်မှုဖြစ်တဲ့နေရာမှာ ယာဉ်တိုက်မှုကြောင့် နောက်ထပ်တယောက် ဒဏ်ရာရရှိခဲ့ကြောင်း သိရပါတယ်။

ပစ်ခတ်မှုမှာ မော်တော်ယာဉ်တစီး ပါဝင်ခဲ့ပြီး သေနတ်သမားနှစ်ယောက် ဖြစ်နိုင်ကြောင်း ရဲမှူးဘရောင်းက ပဏာမရရှိတဲ့ အချက်အလက်တွေကို ကိုးကား ပြောပါတယ်။

ရဲတပ်ဖွဲ့ဟာ ပြစ်မှုကျူးလွန်သူတွေကို ဖော်ထုတ်နိုင်ခြင်း မရှိသေးသလို ပစ်ခတ်မှုအကြောင်းရင်း အသေးစိတ်ကိုလည်း မသိရှိရသေးကြောင်း သူက ရှင်းလင်း ပြောကြားခဲ့ပါတယ်။