ရခိုင်ပြည်နယ်၊ မောင်တောမြောက်ပိုင်း၊ ရန်အောင်မြင်ကျေးရွာ နယ်ခြားစောင့်စခန်းကို နိုဝင်ဘာ ၁၀ ရက် ဒီနေ့ နေ့လယ် ၃ နာရီလောက်ကစပြီး ရက္ခိုင့်တပ်တော် (အေအေ) က ဝင်တိုက်နေတယ်လို့ ရန်အောင်မြင်ကျေးရွာ ဒေသခံတွေက အတည်ပြုပြောပါတယ်။

“ဒီနေ့ နေ့လယ် ၃ နာရီလောက်မှာ ဝင်တိုက်တာ။ တိုက်ပွဲက တော်တော်လေး ပြင်းထန်နေပါတယ်။ ရွာသူ ရွာသားတွေကတော့ အားလုံး နေအိမ်တွေအောက်မှာ ပုန်းသူပုန်း၊ ဘုန်းကြီးကျောင်းကို ပြေးသူပြေး ပြေးနေကြရတယ်။ ရွာပြင်ကိုလည်း ထွက်မရဘူး။ စစ်တပ်ကဝိုင်းထားတယ်။”

လက်ရှိ ရန်အောင်မြင်ကျေးရွာအနီးတဝိုက်ကို ကြိမ်​ချောင်း ၂၄ ဗျူဟာစခန်းနဲ့ နခခ ၇ တို့က လက်နက်ကြီးပစ်ကူပေးနေပြီး ရန်အောင်မြင်ကျေးရွာစွန်မှ ဦးလှစောအောင် နေအိမ် မီးလောင်ပျက်စီးသွားတယ်လို့ ဒေသခံတွေက ပြောပါတယ်။

ရန်အောင်မြင် နယ်ခြားစောင့်စခန်းမှာ လက်နက်ကြီးအထိုင်စခန်းချဖို့ စစ်ကောင်စီက ကြိုးစားလာနေတာကြောင့် အဲဒီနယ်ခြားစောင့်စခန်းကို အေအေက အခုလို ဝင်တိုက်တာဖြစ်နိုင်ကြောင်း မောင်တောဒေသ စစ်ရေးလေ့လာသူတဦးက ပြောပါတယ်။

“ရန်အောင်​မြင်ကျေးရွာအနီး နယ်ခြားစောင့်စခန်းမှာ စစ်တပ်က လက်နက်ကြီးအထိုင်စခန်းချဖို့ ပြင်ဆင်နေကြတယ်။ အဲ့ဒါကို အေအေဘက်က လက်ဦးမှုရယူတဲ့သဘောနဲ့ ဝင်တိုက်တာ။”

နိုဝင်ဘာ ၄ ရက်ကလည်း ရန်အောင်မြင်ကျေးရွာအနီးမှာ စစ်ကောင်စီတပ်နဲ့ ရက္ခိုင့်တပ်တော် (အေအေ) တို့ ထိတွေ့တိုက်ပွဲ အနည်းငယ် ဖြစ်ပွားခဲ့ပြီးနောက် စစ်ကောင်စီတပ်က အဲဒီကျေးရွာကို ဒီနေ့အထိ ပိတ်ဆို့ဝိုင်းထား​တာ ဖြစ်ပါတယ်။