စစ်အာဏာသိမ်းပြီးနောက် မြန်မာနိုင်ငံမှာ တရားဥပဒေ မရှိတော့ဘဲ ပျက်စီးနေတာကို  ဖော်ထုတ်ပြသတဲ့ Failed Law လှုပ်ရှားမှုတွေကို ရန်ကုန် အပါအဝင် တခြားမြို့နယ်တွေမှာလည်း နိုဝင်ဘာလ ဒုတိယပတ်ကစပြီး ဆက်တိုက်ပြုလုပ်နေပါတယ်။

အဲဒီလှုပ်ရှားမှုကို နိုဝင်ဘာ ၁၂ ရက်က စတင်ပြုလုပ်ခဲ့ကြတာဖြစ်ပြီး စက္ကူအဖြူပေါ်မှာ မှင်အနီနဲ့ ရေးသားထားတဲ့ Failed Law စာသား၊ စတစ်ကာတွေကို YBS ကားတွေပေါ် ကပ်ပြီး တရားရုံးတွေနဲ့ အထင်ကရနေရာတွေမှာ Failed Law ပုံ နောက်ခံရိုက်ပြီး စတင်ခဲ့တာပါ။

နိုဝင်ဘာ ၁၂ ရက်မှာ တော်လှန်လူငယ် Demon အဖွဲ့က ကားတွေပေါ်မှာ စတင်ခဲ့ပြီး နိုဝင်ဘာ ၁၃ ရက်နေ့မှာ ရန်ကုန်လူထုသပိတ် အပါအဝင် ကျောင်းသားအဖွဲ့အစည်းတွေက Failed Law Failed Education လှုပ်ရှားမှုတွေကို ဆက်တိုက်ပြုလုပ်လာပါတယ်။

အဲဒီနောက်ပိုင်းမှာတော့ ရန်ကုန်မြို့အပါအဝင် ရှမ်းပြည်နယ်တွေမှာလည်း အခုလှုပ်ရှားမှုကို ဆက်လက် ပြုလုပ်လာခဲ့ကြတယ်လို့ ဒေသတွင်း သတင်းရင်းမြစ်တွေအရ သိရပါတယ်။

Failed Law လှုပ်ရှားမှုနဲ့အတူ စစ်ကောင်စီကကျင်းပမယ့် ၂၀၂၃ ခုနှစ် ရွေးကောက်ပွဲကို သပိတ်မှောက်ကြဖို့ မတရားတဲ့ အမိန့်အာဏာမှန်သမျှ နည်းပေါင်းစုံနဲ့ တွန်းလှန်ကြဖို့ တော်လှန်ရေးအသိ တော်လှန်ရေးသတိ အမြဲရှိကြဖို့ စတဲ့အချက်တွေ တောင်းဆိုလာတာကို တွေ့ရပါတယ်။

တရားဥပဒေ ပျက်စီးနေသရွေ့၊ တရားမျှတမှု ဆိတ်သုဉ်းနေသရွေ့ Failed Law လှုပ်ရှားမှု အသက်ဝင်နေမှာဖြစ်ပြီး ပြည်သူတွေအနေနဲ့ ကောက်ရိုးမီးမဟုတ်ဘဲ စစ်အာဏာရှင်ကို အမြစ်ပြတ်တွန်းလှန်ကြဖို့ ရန်ကုန်လူထုသပိတ်က နှိုးဆော်ထားပါတယ်။