ကမ္ဘာ့ဖလား အုပ်စု ဘီ ဒုတိယပွဲအဖြစ် အီရန်နဲ့ ဝေးလ်စ်တို့ ဒီနေ့ညနေက ယှဉ်ပြိုင်ရာ အီရန်က ၂ ဂိုး ဂိုးမရှိနဲ့ အနိုင်ရသွားပါတယ်။

အီရန်အသင်းဟာ အုပ်စုအဖွင့်ပွဲအဖြစ် အင်္ဂလန်ကို ရှုံးနိမ့်ခဲ့တဲ့ပွဲကထက် ခြေစွမ်းပိုကောင်းခဲ့ပြီး ဝေးလ်စ်အသင်းကို ဖိအားပေးနိုင်ခဲ့ပါတယ်။

ပထမပိုင်း ပွဲချိန် ၁၅ မိနစ်မှာပဲ အီရန်အသင်း ဂိုးသွင်းနိုင်ခဲ့ပေမဲ့ လူကျွံဘောဖြစ်နေတာကြောင့် နစ်နာခဲ့ရပါတယ်။

ပထမပိုင်းမှာ နှစ်ဖက် အပြန်အလှန် ကစားခဲ့ပေမဲ့ ဂိုးမသွင်းနိုင်ခဲ့ဘဲ သရေကျခဲ့ပြီး အီရန်အတွက် အနိုင်ဂိုး ၂ ဂိုးစလုံးကို သာမန်ပွဲကစားချိန်ပြီးလို့ နာကျင်အချိန်ပိုမှာမှ သွင်းယူနိုင်ခဲ့တာပါ။

ပွဲချိန် ၈၆ မိနစ်မှာ အီရန်တိုက်စစ်ကို ကာကွယ်ရင်း ဝေးလ်စ်ဂိုးသမား တိုက်ရိုက်အနီကတ်နဲ့ အထုတ်ခံခဲ့ရတဲ့အတွက်လည်း ဝေးလ်စ်အသင်း အားလျော့ခဲ့ရပါတယ်။

အီရန်အတွက် အနိုင်ဂိုးတွေကို ပွဲပြီးကာနီး နာကျင်အချိန်ပို ၈ မိနစ်မှာ ချက်ရှ်မီနဲ့ ၁၁ မိနစ်မှာ ရာဇာယန်တို့က သွင်းယူပေးခဲ့ပါတယ်။

အီရန်အသင်းဟာ အုပ်စုတွင်း ၂ ပွဲကစားပြီး တပွဲနိုင်၊ တပွဲရှုံး ရမှတ် ၃ မှတ်နဲ့ လတ်တလော အုပ်စု ဒုတိယနေရာမှာ ရပ်တည်နေပြီး ဝေးလ်အသင်းကတော့ ရမှတ် ၁ မှတ်နဲ့ အုပ်စုအောက်ဆုံးမှာ ရပ်တည်နေပါတယ်။

အုပ်စု ဘီ နောက်ထပ်ပွဲစဉ်အဖြစ် အင်္ဂလန်နဲ့ အမေရိကန်တို့ ဒီည ယှဉ်ပြိုင်ကြမှာ ဖြစ်ပါတယ်။