ကမ္ဘာ့ပြိုင်ဆိုင်မှု အပြင်းထန်ဆုံး ပင်လယ်ရေပြင်တွေထဲက တခုဖြစ်တဲ့ တောင်တရုတ်ပင်လယ်မှာ အမေရိကန်ရဲ့ စစ်ရေးအင်အားကို ပြသတဲ့ အနေနဲ့ USS နစ်မစ်ဇ် လေယာဉ်တင် သင်္ဘောရဲ့ ကုန်းပတ်ပေါ်ကနေ ဒါဇင်ချီတဲ့ တိုက်ခိုက်ရေး လေယာဉ်တွေနဲ့ ရဟတ်ယာဉ်တွေ နာရီချီအောင် ပျံသန်းလေ့ကျင့်ခဲ့ပါတယ်။

လွန်ခဲ့တဲ့ သီတင်းပတ် ၂ပတ်က တောင်တရုတ်ပင်လယ်ရေပြင်ထဲ ဝင်ရောက်လာတဲ့ တိုက်ခိုက်ရေး စစ်သင်္ဘော အုပ်စုကို USS နစ်မစ်ဇ် လေယာဉ်တင် သင်္ဘောက ဦးဆောင်ပါတယ်။

သူ့ရဲ့ ကုန်းပတ်ပေါ်ကို  MH-60 Seahawk ရဟတ်ယာဉ်တွေနဲ့ F/A-18 Hornet ဂျက်လေယာဉ်တွေ ဆင်းသက်ချိန်မှာ အော်သံတွေ ဆူညံနေပြီး သင်္ဘောသားတွေကတော့ သူတို့ရဲ့ ခရီးဟာ ယခုအချိန်အထိ ချောချောမောမောပဲလို့ ပြောပါတယ်။

ဒီခရီးစဉ်ဟာ ကမ္ဘာလုံးဆိုင်ရာ ကုန်သွယ်မှုအတွက် အရေးပါတဲ့ ဒေသတစ်ခုရဲ့ ရေပိုင်နက်နဲ့ လေပိုင်နက်အတွင်း လွတ်လပ်စွာ ဖြတ်သန်းသွားလာခွင့်ကို ထိန်းသိမ်းဖို့ အမေရိကန်ရဲ့ ကတိကဝတ် တစ်စိတ်တစ်ပိုင်းဖြစ်တယ်လို့  တပ်မှူး ရေတပ်ဗိုလ်ချုပ် ခရစ္စတိုဖာ ဆွီးနေးက ပြောပါတယ်။

နှစ်စဉ် ကုန်သွယ်မှု ဒေါ်လာ ၃ ဒသမ ၄ ထရီလီယံလောက်ရှိတဲ့ တောင်တရုတ်ပင်လယ်မှာ အမေရိကန်ရဲ့ တည်ရှိမှုကို ဂျပန်၊ တောင်ကိုရီးယား၊ ဖိလစ်ပိုင်နဲ့ သြစတြေးလျလို မဟာမိတ်တွေက ကြိုဆိုခဲ့ပေမယ့် စစ်ရေးလေ့ကျင့်မှုကို ရန်စမှုအဖြစ် ရှုမြင်တဲ့ ပြိုင်ဘက် တရုတ်နိုင်ငံကို ဆက် စိန်ခေါ်နေတာပါ။

ဗီယက်နမ်၊ မလေးရှား၊ ဘရူနိုင်းနဲ့ ဖိလစ်ပိုင်တို့ရဲ့ သီးသန့်စီးပွားရေးဇုန်တွေပါတဲ့ တောင်တရုတ် ပင်လယ်တစ်ခုလုံးနီးပါးရဲ့ သမိုင်းဝင်တရားစီရင်ပိုင်ခွင့်ကို တရုတ်က တောင်းဆိုထားပါတယ်။

တရုတ်ပြည်မကြီးအစိုးရဟာလည်း ပုံမှန် စစ်ရေးလေ့ကျင့်ခန်းတွေလုပ်နေပြီး ပြည်မကြီးနဲ့ အလှမ်းဝေးတဲ့ ကမ်းရိုးတန်းအစောင့်တွေနဲ့ ငါးဖမ်းသင်္ဘောတွေကို ထိန်းသိမ်းထားလို့  အိမ်နီးချင်း တွေနဲ့ မကြာခဏ ဆက်ဆံရေး တင်းမာနေပါတယ်။

နစ်မစ်ဇ် လေယာဉ်တင်သင်္ဘော တိုက်ခိုက်ရေးအုပ်စု ၁၁ မှာ ပဲ့ထိန်းဒုံးကျည် ခရူဇာဘန်ကာဟေးလ် နှင့် တခြားပဲ့ထိန်းဒုံးကျည်တွေ ပါပါတယ်။

နိုင်ငံတကာစည်းမျဉ်းတွေကို လိုက်နာဖို့ အရေးကြီးတယ်၊ တောင်တရုတ်ပင်လယ်မှာ အမေရိကန် တည်ရှိမှုဟာ ဒေသတွင်း မဟာမိတ်တွေရဲ့ အမေရိကန်ရဲ့ ကတိကဝတ်ကို သက်သေပြခဲ့ပြီး အမေရိကန်ဟာ ခုအချိန်မှာ ဘယ်နေရာမှ မသွားတော့ဘူးလို့ ပြောခဲ့ပါတယ်။

အနာဂတ်မှာခုလို တပ်ဖြန့်တာတွေ လုပ်နိုင်လို့၊ မျှော်လင့်ထားနိုင်တယ်လို့လည်း သူက ဆက်ပြောခဲ့ပါတယ်။

ဝိန်း အီး မေယာနဲ့ ကျုံးဟွန် ဖျက်သင်္ဘောတွေက ဇန်နဝါရီ ၅ ရက်မှာ ထိလွယ်ရှလွယ် ထိုင်ဝမ်ရေလက်ကြားကို ဖြတ်ကျော် ခုတ်မောင်းခဲ့လို့ တရုတ်နိုင်ငံ ဒေါသထွက် ခဲ့ပါတယ်။

တရုတ်ရေတပ်က J-11 တိုက်လေယာဉ်တစ်စီး တောင်တရုတ်ပင်လယ်ကို ဖြတ်ပြီး အမေရိကန် လေတပ် လေယာဉ်ရဲ့ ၁၀ ပေ အကွာမှာ သတိပေးချက်ထွက်ပေါ်လာပြီးတဲ့နောက် နှစ်ပတ် အကြာမှာ ခုလို ထွက်ပေါ်လာတာ ဖြစ်ပါတယ်။